म्याग्दीको धौलागिरि गाउँपालिका–३ मा पर्ने दरखोलामा मोटरेबल पुल नबन्दा दर र मुदीका स्थानीय बासिन्दा वर्षौंदेखि सास्ती भोगिरहेका छन्।
चार वर्षअघि पुल निर्माणका लागि सर्वेक्षण भए पनि बजेट अभाव र योजना अघि नबढ्दा काम सुरु हुन सकेको छैन। पुल नहुँदा वडा नम्बर ३ दर र वडा नम्बर ४ मुदीका बासिन्दा सबैभन्दा बढी प्रभावित भएका छन्।
हिउँदमा अस्थायी रूपमा ह्युम पाइप राखेर सवारी चलाइए पनि बर्खामा खोलामा बाढी आउँदा असारदेखि कात्तिकसम्म यातायात पूर्ण रूपमा बन्द हुन्छ।
दर, मुदी, बगर, नाउरा, नेरवाङ, चेचुङ, खिवाङ र खाम्ला गाउँलाई गाउँपालिकाको केन्द्र मुना जोड्ने सडकमा नियमित सवारी चलाउन २५ मिटर लामो पुल आवश्यक रहेको स्थानीयको भनाइ छ। यी क्षेत्रमा करिब ७०० घरधुरी बसोबास गर्छन्।
स्थानीय युवाक्लबका प्रतिनिधिले पुल निर्माण आफ्नो मुख्य माग भएको बताएका छन् र निर्वाचनका उम्मेदवारहरूसँग पनि यस विषयमा दबाब दिइएको छ।
पुल नहुँदा बर्खामा खाद्यान्न र निर्माण सामग्री ढुवानी गर्न, बिरामीलाई अस्पताल लैजान र कृषि तथा पशुजन्य उत्पादन बजार पठाउन समस्या हुने गरेको स्थानीयको गुनासो छ।
गाउँपालिकाले २०७८/७९ मा विस्तृत परियोजना प्रतिवेदन तयार पारेको थियो। गण्डकी प्रदेश सरकारले २०८०/८१ मा ५० लाख र २०८१/८२ मा ३० लाख रुपैयाँ बजेट छुट्याए पनि राजनीतिक अस्थिरताका कारण योजना अघि बढ्न सकेन।
संघीय सरकारबाट माग गरिएको योजना पनि सम्बोधन नभएपछि गाउँपालिकाले २०८२/८३ मा १५ लाख रुपैयाँ छुट्याएको छ।
नीति तथा कार्यक्रममा जलविद्युत् आयोजनासँग सहकार्य गरी बेलिब्रिज बनाउने उल्लेख छ।
तर स्थानीय बासिन्दा जलविद्युत् आयोजनाको सामाजिक उत्तरदायित्वको रकम पुलमा खर्च गर्न नहुने पक्षमा छन् भने आयोजनाहरू पनि थप आर्थिक भार लिन इच्छुक छैनन्। पर्याप्त स्रोत नहुँदा पुल निर्माण अझै अनिश्चित बनेको छ।