मध्य प्रदेशका मुख्यमन्त्री मोहन यादवले भोपालमा ९० डिग्री मोड भएको रेलवे ओभरब्रिज (आरओबी) निर्माणमा त्रुटि भएको घटनामा सात इन्जिनियरहरूलाई निलम्बन गरेका छन्।
साथै, अवकाशप्राप्त इन्जिनियरविरुद्ध विभागीय अनुसन्धान गरिने भएको हो।
सरकारले यो ओभरब्रिज डिजाइन र निर्माण गर्ने दुई फर्महरूलाई पनि कालोसूचीमा राखेको छ।
निलम्बित हुनेहरूमा दुई प्रमुख इन्जिनियरहरू पनि छन्। यी इन्जिनियरहरू र फर्महरूले ओभरब्रिजको डीपीआर तयार गरेका थिए भने स्वीकृति दिएपछि निर्माण गराएका थिए।
मानिसहरूले यसमा यात्रा गरे दुर्घटना हुन सक्ने डर व्यक्त गरेका थिए। मुख्यमन्त्री मोहन यादवले यसबारे अनुसन्धानको आदेश दिँदै रिपोर्ट आएपछि जिम्मेवारहरूलाई कारबाही गर्न आदेश दिएका थिए।
ऐशबाग ओभरब्रिज निर्माणमा भएको ‘गम्भीर लापरबाही’ को बारेमा जानकारी लिँदै मुख्यमन्त्री यादवले छानबिनको आदेश दिएका थिए।
उनले भने, ‘अनुसन्धान प्रतिवेदनको आधारमा, सार्वजनिक निर्माण विभागका आठ इन्जिनियरहरू विरुद्ध कारबाही गरिएको छ।
दुई प्रमुख इन्जिनियरहरूसहित सात इन्जिनियरहरूलाई तत्काल प्रभावबाट निलम्बन गरिएको छ।
अवकाशप्राप्त एसई विरुद्ध विभागीय छानबिन गरिनेछ।’
उनले थपे, ‘यस परियोजनामा ओभरब्रिजको त्रुटिपूर्ण डिजाइन पेस गरेकोमा निर्माण एजेन्सी र डिजाइन परामर्शदाता दुवैलाई कालोसूचीमा राखिएको छ।’
मुख्यमन्त्रीले ओभरब्रिजमा आवश्यक सुधार गर्न समिति गठन गरिएको र सुधार भएपछि मात्र यसको उद्घाटन गरिने बताएका छन्।