नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा) ले वरिष्ठ उद्योगपति तथा नेपाल उद्योग वाणिज्य महासंघका पूर्व अध्यक्ष शेखर गोल्छासँग सम्बन्धित हालैका घटनाक्रमप्रति आफ्नो गम्भीर ध्यानाकर्षण भएको जनाएको छ।
नाइमाले एक विज्ञप्ति जारी गर्दै कुनै पनि व्यक्तिमाथि कारबाही वा कठोर कदम चाल्नुअघि स्पष्टीकरणको पर्याप्त अवसर दिनुपर्ने माग गरेको छ।
संस्थाले विधिको शासन र पारदर्शिताको वकालत गर्दै पर्याप्त प्रमाणबिना चालिने कदमले समग्र प्रणाली र निजी क्षेत्रको मनोबलमा नकारात्मक असर पुग्ने उल्लेख गरेको छ।
विज्ञप्तिका मुख्य बुँदाहरू:
न्यायिक प्रक्रिया: कुनै पनि विषयमा तथ्यका आधारमा निष्पक्ष अनुसन्धान हुनुपर्ने र दोषी देखिएमा कानुन बमोजिम कारबाही हुनुपर्नेमा संस्था अडिग रहेको छ।
निजी क्षेत्रको मनोबल: मुलुकको अर्थतन्त्र, रोजगारी र राजस्वमा महत्त्वपूर्ण योगदान पुर्याउने निजी क्षेत्रलाई राज्यले उचित सम्मान र व्यवहार गर्नुपर्ने।
संवेदनशीलताको माग: सम्बन्धित निकायहरूले यस्ता विषयमा आवश्यक संवेदनशीलता र उचित विवेक अपनाउन नाइमाले विनम्र अनुरोध गरेको छ।
नाइमाले प्रक्रियागत स्पष्टता र सन्तुलनले मात्र प्रणालीप्रतिको जनविश्वास सुदृढ हुने विश्वास व्यक्त गरेको छ।
