रौतहट जिल्लाको गरुडा नगरपालिका-४ स्थित मेनरोडमै रहेको एक मोटरसाइकल पसल, कुशवाहा इन्टरप्राइजेजमा सोमबार राती विद्युत् सर्ट भई आगलागी हुँदा करोडौँको क्षति भएको छ।
मोटरसाइकल पसलका साथै स्पेयर पार्टस्मा, मर्मत पसलका र आडैमा रहेको भण्डारण घर समेतमा आगलागी हुँदा करिब ६ करोडभन्दा बढीको क्षति भएको प्रहरीको प्रारम्भिक अनुसन्धानमा खुलेको छ।
सोमबार होली खेल्न सबै गाउँ गएको बेलामा राति विद्युत् सर्ट भई आगो लागेको हुनसक्ने प्रहरीकाे अनुमान छ।
दाजु दिलीप कुशवाहाको घरमा भाइ रणधीर कुशवाहाले विगत सात वर्षदेखि कुशवाहा इन्टरप्राइजेज संचालन गर्दै आइरहेका थिए।
आगलागीको सूचना पाउनसाथ इलाका प्रहरी कार्यालय गरुडाको प्रहरी टोली, स्थानीयवासी, गौर, चन्द्रपुर र बाराको निजगढ नगरपालिकाको समेत गरी तीन वारुणयन्त्रले आगोलाई निकै कठिनाइपूर्वक नियन्त्रणमा लिइएको प्रहरीले जनाएको छ।
आगलागीबाट चार तले घर, १२ थान मोटरसाइकल, विभिन्न स्पेयर पार्टस लयागत अन्य सामाग्री समेत जलेर खरानी भएको छ।