एसिया अटो जिमखाना: नेपाल भारतमा -

जिमखाना मोटर स्पोर्ट्स अन्तर्गतको एक लोकप्रिय विधा हो, जुन एशियाली महादेशमा अत्यन्तै सम्भावनायुक्त मानिन्छ।
यस प्रतियोगितामा प्रतिस्पर्धी ड्राइभरहरूले कलात्मक ढङ्गले डिजाइन गरिएको प्राविधिक सर्किटमा आयोजकले दिएको रुटम्याप पछ्याउँदै सकेसम्म छोटो समयमा र न्यून पेनाल्टीसहित आफ्नो रेसिङ पूरा गर्नुपर्ने हुन्छ।

नेपाली ड्राइभरहरूले झण्डै एक दशकदेखि एसिया प्यासिफिकका विभिन्न अटो जिमखानामा आफूलाई प्रतिस्पर्धी बनाइरहेका छन्।
गत महिना मात्रै सम्पन्न एसिया प्यासिफिक मोटर स्पोर्ट्स च्याम्पियनसिप अन्तर्गतको सोलो इभेन्टमा नेपालका आशिष भारतीले १७ देशका ड्राइभरहरूलाई पछि पार्दै ऐतिहासिक स्वर्ण पदक प्राप्त गरेका थिए।
अनुभवी ड्राइभर जयप्रताप मास्के र रविन सुनुवार यसअघि कोलम्बोमा सम्पन्न एसिया प्यासिफिक मोटरस्पोर्ट्स च्याम्पियनसिपको अटोक्रस विधामा समेत सहभागी भइसकेका छन्। विपासना तामाङ पनि यसपटक प्रतिस्पर्धा गर्दैछिन्।

यस वर्षको एसिया अटो जिमखाना सिरिज काजाकिस्तानबाट सुरु भएर श्रीलंकापछि भारतमा आयोजना भइरहेको हो।
यसपछिका दुई इभेन्टहरू यसै वर्षभित्र ताइवान र उज्बेकिस्तानमा आयोजना हुनेछन्।
भारतको गुडगाउँमा आयोजना भइरहेको तेस्रो राउन्डको आज (नोभेम्बर १, २०२५) Qualifying Round का खेलहरू सञ्चालन हुनेछन् भने फाइनल राउन्डका खेलहरू भोलि नोभेम्बर २ तारिखमा हुनेछन्।
अटो जिमखानालाई मोटर स्पोर्ट्सको अन्तर्राष्ट्रिय गवर्निङ बडी एफआईएले समेत मान्यता (endorse) दिइसकेको छ।