बाढीपहिरोका कारण देशभरका विभिन्न सडकहरू अवरुद्ध भएका छन्। यसले गर्दा आवागमनमा समस्या आएको छ।
विशेषगरी बीपी राजमार्ग ३० दिनका लागि राती बन्द हुने भएको छ।
कहाँ-कहाँ समस्या?
बीपी राजमार्ग: सिन्धुली-खुर्कोटदेखि काठमाडौंसम्म राती ६:३० बजेदेखि बिहान ५:०० बजेसम्म ३० दिनका लागि सबै सवारीसाधनका लागि बन्द गरिएको छ।
बनेपा-नाला-भक्तपुर सडक: काभ्रेको बनेपा नगरपालिका-४ मा पहिरो खसेकाले यो सडक पूर्ण रूपमा अवरुद्ध छ।
कोशी राजमार्ग (संखुवासभा): जेठ ६ गतेदेखि बाढीले अवरुद्ध भएको यो खण्ड मनसुनभर खुल्ने सम्भावना कम छ।
अरनिको राजमार्ग (सिन्धुपाल्चोक): भोटेकोशी गाउँपालिका-२ को कोदारीमा पहिरोले सडक पूर्ण रूपमा बन्द छ।
कान्ति लोकपथ: ललितपुर र मकवानपुर खण्डमा राती ७:०० बजेदेखि बिहान ६:०० बजेसम्म गाडी चलाउन पाइने छैन।
काठमाडौं-फर्पिङ-कुलेखानी सडक: फर्पिङदेखि हात्तिगाउँडासम्म सडक निर्माणका लागि असार २५ गतेसम्म बन्द गरिएको छ।
यसका साथै कालीगण्डकी करिडोर, सहिद राजमार्गको रोल्पा खण्ड, भेरी करिडोर, मध्यपहाडी राजमार्गको जाजरकोट खण्ड, मार्तडी-कोल्टी सडक र कर्णाली करिडोर लगायतका धेरै सडकहरू पनि पहिरो र बाढीका कारण आंशिक वा पूर्ण रूपमा अवरुद्ध छन्।
यात्रा गर्नुअघि सडकको अवस्थाबारे जानकारी लिनुहुन अनुरोध छ।