किङलङको १६ सिटर इभी सार्वजनिक

सीजी मोटर्सले अत्याधुनिक फिचर र शक्तिशाली इन्जिनसहितको नयाँ ‘किङलङ’ १६ सिटर इलेक्ट्रिक भ्यान नेपाली बजारमा ल्याएको छ।

यो भ्यानको मुख्य विशेषता यसमा प्रयोग गरिएको ७५.४१ किलोवाट आवरको ‘ब्लेड ब्याट्री’ हो, जसले सुरक्षा र लामो आयु सुनिश्चित गर्ने कम्पनीको दाबी छ।

१२० किलोवाटको शक्तिशाली मोटर जडान गरिएको यस सवारीको मूल्य ७२ लाख ५० हजार रुपैयाँ तोकिएको छ, जुन व्यावसायिक प्रयोजनका लागि उपयोगी हुनेछ।

कम्पनीका अनुसार यो भ्यानले नेपालको व्यावसायिक विद्युतीय सवारी क्षेत्रमा नयाँ मापदण्ड कायम गर्दै किफायती र वातावरणमैत्री यातायात समाधान दिनेछ।

किङलङका गाडीहरूलाई देशभरका २६० भन्दा बढी चार्जिङ स्टेशन, २० सर्भिस स्टेशन र १४ डिलर नेटवर्कमार्फत सेवा दिइने सीजी मोटर्सले जनाएको छ।

फराकिलो र आरामदायी इन्टेरियर रहेको यो भ्यान लामो र छोटो दूरीका सार्वजनिक यातायात व्यवसायीहरूका लागि उत्कृष्ट विकल्प बन्न सक्ने देखिन्छ।

चीनको प्रसिद्ध निर्माता किङलङको यस नयाँ मोडलले नेपालमा बढ्दो विद्युतीय गाडीको मागलाई सम्बोधन गर्ने विश्वास लिइएको छ।