मुग्लिन सडक फेरि पहिरोले बन्द

मुग्लिन-नारायणगढ सडक खण्ड फेरि पहिरोले अवरुद्ध भएको छ।

मुग्लिन नजिकैको तुइनखोलामा ठूलो पहिरो खस्दा दुईतर्फी सवारी चल्न नसकेको प्रहरीले जानकारी दिएको छ।

यस कारण सयौँ यात्रु बीच बाटोमै अलपत्र परेका छन्।

सडक खुलाउन डोजर परिचालन गरिएको छ तर लगातार पहिरो खसिरहेकाले काम अघि बढ्न सकिरहेको छैन।

यसले काठमाडौँ, पोखरा, चितवन हुँदै तराईतर्फ जाने यात्रुहरूलाई ठूलो समस्या परेको छ।

यात्रुलाई वैकल्पिक मार्ग प्रयोग गर्न अनुरोध गरिएको छ।

त्यसका लागि नौबिसे-दामन-हेटौँडा मार्ग र मुग्लिन-भिमाद-डेढगाउँ हुँदै गैंडाकोट पुग्ने कालीगण्डकी करिडोर प्रयोग गर्न सकिने जानकारी दिइएको छ।

स्थानीय प्रशासनले यात्रुहरूको सुरक्षालाई प्राथमिकता दिँदै पहिरो पूर्ण रूपमा रोकिएपछि मात्र सडक खुलाउने जनाएको छ।