नाडा अटोमोवाइल एसोसिएसन अफ नेपालका प्रतिनिधीले भन्सार विभागका महानिर्देशक चक्रवहादुर बुढासंग भेटगरी नेपालको भन्सार नाकाहरुमा जम्मा भएका सवारी साधनहरुको भन्सार जाँच पासका सम्बन्धमा विस्तृत छलफल गरेको छ ।
उक्त छलफलमा नाडाका उपाध्यक्ष राजनबाबु श्रेष्ठले सरकारले विभिन्न चरणमा ल्याएका नितिहरुको कारण अटोमोवाइल व्यवसायीहरु धरासायी हुने अवस्थामा पुगेको बताउँदै बैंक लगायतका वित्तिय निकायहरुले लगाएको उच्च व्याज दर, अटो लोन हायर पर्चेज कर्जामा जोखिम भार १५० प्रतिशतमा पु¥याइएका कारण व्यावसायीहरु अफ्ठेरोमा परेको धारण व्यक्त गरे ।
बैंकहरुबाट नीजि सवारी साधनको हायर पर्चेज लोन प्रवाह गर्ने प्रक्रियामा लोन टु भ्यालु रेसियोको सीमा ५० प्रतिशत पु¥याइएको लगायत कारणले बजारमा सवारी साधनहरु विक्री हुन नसकेकोले सवारी साधन पैठारीकर्ताहरुले भन्सारमा आईपुगेका सवारी साधनहरुको भन्सार जाँच पास गर्न नसकेको उनले वताए ।
सो छलफलमा श्रेष्ठले व्यावसायिक महत्वका सवारी तथा ढुवानीका साधनहरुको बिक्री समेत दुई तिहाईले घटेको जानकारी दिए ।
सो छलफलका क्रममा नाडाका पुर्व अध्यक्ष सुनिल खेतानले भन्सार जाँच पासका लागि विभागले तोकेको सवै कागजातहरु पेश गर्दा पनि भन्सार जाँच पासमा कठीनाई उत्पन्न भईरहेको गुनासो व्यक्त गरे ।
सोही क्रममा नाडाका महासचिव सुरेन्द्रकुमार उप्रेतिले कोभिडको समयमा नियन्त्रणमा आएको अनधिकृत आयात अहिले निकै बढन थालेकोले यसको नियन्त्रणका लागि विभागले आवश्यक पहल गर्नुपर्ने भन्दै कम्प्युटर विलिङ्गलाई अनिवार्य गर्नु पर्ने धारणा राखे ।
टु ह्वीलर समितिका सभापति अभिक ज्योतिले उच्च व्याज दरका कारण मोटरसाइकलको आयातमा ५० प्रतिशतले कमी आएको जानकारी दिए ।
त्यसैगरी राजश्व समितिका सभापति आकाश गोल्छाले नेपालमा सवारी साधनको एसेम्बल प्लान्ट खोल्न फीजिविलिटी नभएका सवारी साधन पैठारीकर्ताहरुले सवारी साधनको एसेम्बल प्लान्ट खोल्न फीजिविलिटी भएका कम्पनीहरुसंग मिलेर आफनो ब्राण्डको एसेम्बल गर्न सकिने व्यवस्थाका लागि आवश्यक पहल गरि दिन आग्रह गरेका थिए ।
छलफलमा महानिर्देशक बुढाले सरकारलाई राजश्व संकलनको दवाव परिरहेको वताउँदै विभागले व्यवसायीहरुको मागलाई यथासंम्भव सम्बोधन गर्ने आश्वसन दिए ।
सोहि क्रममा महानिर्देशक बुढाले नेपालका भन्सार नाकाहरुमा आईसकेका सवारी साधनहरुको यथासंम्भव भन्सार जाँच पासका लागि आग्रह गर्दे नेपालका भन्सार नाकाहरुमा कुन कुन ब्राण्डका के कति सवारी साधनहरु छन् त्यसको तथ्याङ्क उपलब्ध गराई दिन समेत अनुरोध गरेका थिए ।
