नेपालको पहिलो ‘फ्लाई ओभर’ ग्वार्कोमा बन्ने

सडक विभागका महानिर्देशक अर्जुनजंग थापाले शुक्रबारदेखि ग्वार्काे फ्लाई ओभरको निर्माण सुरु हुने बताए । त्यसका लागि आवश्यक तयारी पूरा भएको उनको भनाइ छ ।

विभागले ट्राफिक व्यवस्थापन सहज बनाउने उद्देश्यसहित चक्रपथको ग्वार्काे, एकान्तकुना र सातदोबाटो चोकमा फ्लाई ओभर बनाउने योजना अघि बढाएको थियो । त्यसमा पहिलो चरणअन्तर्गत ग्वार्काे चोकको फ्लाई ओभर निर्माण गर्न लागिएको हो ।

नेपालको सडक सञ्जालनमा बन्न लागेको यो पहिलो फ्लाई ओभर पुल हो ।

यद्यपि, नागढुंगा सुरुङमार्गमा पनि एक फ्लाई ओभर निर्माण हुनेछ । तर, त्यसको अझै निर्माण सुरु भएको छैन । हाल त्यसको डिजाइन बनाउने काम भइरहेको छ । सडक विभागको गुणस्तर, अनुसन्धान तथा विकास केन्द्रका निर्देशक नवीनमान श्रेष्ठले नेपालका लागि यो नै पहिलो फ्लाई ओभर हुने बताए ।