कोबाङ–जोमसोम सडक अलपत्र

राष्ट्रिय गौरवको बेनी–जोमसोम सडक आयोजनामा पर्ने कोबाङ–जोमसोम खण्ड निर्माण कम्पनीको निरन्तर ढिलासुस्तीका कारण आठ वर्षदेखि अधूरै रहेको छ।

७४ किमि बेनी–जोमसोम सडकमध्ये करिब १७ किमि भाग कम्पनीको लापरबाहीका कारण अलपत्र परेको हो।

मुस्ताङको घाँसादेखि माथिल्लो क्षेत्रसम्म कालोपत्र सकिँदै जाँदा पनि कोबाङ–जोमसोम खण्डका तीन ठाउँमा अझै काम पूरा हुन सकेको छैन।

यो खण्डको ठेक्का पप्पु–गौरी पार्वती कोशी & न्यौपानी जेभीले ७० करोडमा ११ मिटर चौडा सडकसहित कालोपत्र गर्ने गरी २०७३/७४ मा लिएको थियो।

पहिलो चरणमा केही काम भए पनि पछि कम्पनीले काम रोकिदिँदा आयोजना बारम्बार ताकेता र कारवाहीको प्रक्रियामा उत्रिएको थियो।

अन्ततः जेभीको मुख्य कम्पनी गौरी–पार्वतीले पुनः जिम्मा लिए पनि अहिले आंशिक रूपमा मात्र काम भइरहेको आयोजना कार्यालयको भनाइ छ।

यस लापरबाहीका कारण कम्पनीलाई कुल ठेक्का रकमको ०.०५% जरिवाना तोकिएको छ।

सडकको म्याद सातौँपटक थपिरहेको छ।
हाल भौतिक प्रगति ९०% र वित्तीय प्रगति ८०% पुगेको आयोजनाले बताएको छ।

बाँकी कामहरू:

• टुकुचेमा ४०० मिटर कालोपत्र र ३०० मिटर आरसीसी सडक

• मार्फा–राजखोला क्षेत्रको १,२०० मिटर कालोपत्र

• जोमसोम विमानस्थल माथिबाट सेनाको ब्यारेकसम्म ५०० मिटर संरचना र कालोपत्र

निर्माण कम्पनीका प्रतिनिधिले मङ्सिर मसान्तभित्र काम सक्ने दाबी गरे पनि हाल कामदार धान काट्न गएका कारण काम रोकिएको बताएका छन्।

सडक पूरा नहुँदा पर्यटक, स्थानीय तथा सवारीसाधन चालकलाई वर्षौं देखि सास्ती भइरहेको छ।

यो खण्ड पूरा भएमा घाँसा–कागबेनी–मुक्तिनाथसम्मको यात्रा सहज हुनेछ।