बाँकेको राप्तीसोनारी गाउँपालिका–३ नारायणपुरबाट दाङको राजपुर गाउँपालिका जोड्ने करिब ३५ किलोमिटर लामो सडक अझै निर्माण हुन सकेको छैन। हुलाकी सडकको यो भाग पूरा नहुँदा सम्पूर्ण राजमार्ग अधुरो बनेको छ।
यो सडक निर्माणका लागि करिब ६ अर्ब रुपैयाँ बजेट आवश्यक पर्ने अनुमान गरिएको छ। सडक निर्देशनालयले केही वर्षअघि नै डीपीआर तयार गरे पनि काम सुरु हुन बाँकी छ।
निर्देशनालयका प्रमुख लीलाबहादुर भण्डारीका अनुसार स्रोत सुनिश्चित गर्न फाइल सम्बन्धित निकायमा पेस भइसकेको छ र छिट्टै बजेट सुनिश्चित भएपछि ठेक्का प्रक्रिया अघि बढाइनेछ।
सडक निर्माणका लागि १५ वटा पुल बनाउनुपर्ने र काम पूरा गर्न चार वर्ष लाग्ने अनुमान गरिएको छ।
सडकको आधाभन्दा बढी भाग जंगल क्षेत्र भएकाले चुनौतीपूर्ण हुने अनुमान गरिएको छ। निर्माण सम्पन्न भए बाँकेको सोनारी क्षेत्रको विकासमा ठूलो टेवा पुग्ने अपेक्षा गरिएको छ।