गल्छी–त्रिशूली–रसुवागढी सडकका लागि बजेट

नेपाल–चीन–भारत जोड्ने छोटो दुरीको गल्छी–त्रिशूली–रसुवागढी सडक निर्माणका लागि सरकारले बजेट विनियोजन गरेको छ।

बहुप्रतिक्षित त्रिदेशीय मार्ग अन्तर्गतको वीरगन्ज–गल्छी–त्रिशूली–रसुवागढी सडक निर्माणका लागि सरकारले साढे दुई अर्बभन्दा बढी बजेट विनियोजन गरेको हो।

अर्थमन्त्री विष्णुप्रसाद पौडेलले संसदमा प्रस्तुत गरेको आगामी आर्थिक वर्षको बजेटमा सो सडक योजनाका लागि कुल २ अर्ब ५६ करोड रुपैयाँ बजेट विनियोजन गरेका हुन्।

सडकले पूर्णता पाएपछि देशको अर्थतन्त्र लयमा आउने बागमती प्रदेशका पूर्वमन्त्री तथा एमाले नुवाकोटका अध्यक्ष बद्री मैनालीले बताए, उक्त सडकलाई समयमै सक्ने गरी योजनाका साथ कार्य गर्नुपर्ने उनले बताए ।

केपी शर्मा ओली पहिलो पटक प्रधानमन्त्री हुँदा नै सो सडकको  निर्माण सुरु भएको थियो।

तर बीचमा रोकिएको उक्त सडकको निर्माणपछि नेपालको आयात–निर्यात बढ्ने बागमती प्रदेशका पूर्वमन्त्री केशवराज पाण्डेको भनाई छ।

यस्तै नुवाकोट उद्योग वाणिज्य संघका अध्यक्ष राजेन्द्र श्रेष्ठले सडकलाई पूर्णता दिएर आर्थिक क्षेत्रलाई विशेष चलायमान बनाउनुपर्ने बताए।

निर्माणाधीन उक्त सडकको गल्छी–त्रिशूली–स्याफ्रुवेशीसम्मको दुरी ८९ किलोमिटर रहेको छ भने स्याफ्रुवेशीदेखि रसुवागढी नाकासम्मको दुरी १५ दशमलव पाँच किलोमिटर रहेको छ।

उक्त सडकको विस्तारका लागि गल्छी–त्रिशूली–स्याफ्रुवेशी–रसुवागढी सडक योजना कार्यालयमार्फत पुनर्निर्माण तथा विस्तार कार्य भइरहेको छ।