अफ्रिकामा बढ्दो विद्युतीय सवारीको क्रेज

पछिल्लो समय अफ्रिकी मुलुकहरूमा विद्युतीय सवारीसाधन (इभी) प्रतिको आकर्षण ह्वात्तै बढेको छ।

विशेषगरी इन्धन संकट र बढ्दो मूल्यका कारण इथियोपिया लगायतका देशहरूले इभीलाई मुख्य विकल्पका रूपमा अपनाउन थालेका छन्।

तथ्यांकअनुसार, अफ्रिकाले चीनबाट गर्ने इभी आयातमा ठूलो वृद्धि देखिएको छ।

सन् २०२४ को तुलनामा २०२५ मा यो आयात दोब्बरभन्दा बढीले बढेको पाइएको छ।

इथियोपियाले त सन् २०२४ देखि नै नयाँ पेट्रोल र डिजेल गाडीको आयातमा पूर्ण प्रतिबन्ध लगाउँदै इभीलाई मात्र अनुमति दिने साहसिक निर्णय गरिसकेको छ।

इन्धन आयातमा हुने अर्बौँ डलरको खर्च कटौती गर्न र ऊर्जा सुरक्षा सुनिश्चित गर्न यी देशहरूले नवीकरणीय ऊर्जाको प्रयोगमा जोड दिएका छन्।

इथियोपियाले हाल ९० प्रतिशतभन्दा बढी ऊर्जा जलविद्युत् र सौर्य शक्तिबाट उत्पादन गरिरहेको छ, जसले इभी सञ्चालनलाई थप सस्तो बनाएको छ।

इन्धनमा हुने मासिक खर्च २७ डलरबाट घटेर चार्जिङमा मात्र ४ डलर पुगेपछि सवारीधनीहरू इभीतिर आकर्षित भएका हुन्।

यद्यपि, पर्याप्त चार्जिङ स्टेशनको अभाव र गाडीको महँगो खरिद मूल्य अझै पनि मुख्य चुनौतीका रूपमा रहेका छन्।

यी चुनौतीका बाबजुद इथियोपियाले सन् २०३० सम्ममा ६० वटा इभी एसेम्बली प्लान्ट स्थापना गर्ने महत्वाकांक्षी लक्ष्य लिएको छ।