लाइसेन्स अब दुई दिनमै

सरकारले सवारी चालक अनुमति पत्र (लाइसेन्स) फारम भरेको ४८ घण्टाभित्रै उपलब्ध गराउने गरी नयाँ व्यवस्था सुरु गरेको छ।

सञ्चार मन्त्रालयका अनुसार यातायात विभागबाट विवरण प्राप्त भएको २४ घण्टाभित्रै सुरक्षण मुद्रण केन्द्रमा कार्ड छापिनेछ।

वर्षौंदेखि पालो कुरेर बसेका करिब २९ लाख चालकले आगामी असार मसान्तभित्रै आफ्नो लाइसेन्स पाउने सुनिश्चित गरिएको छ।

नागरिकमैत्री सेवा प्रवाहका लागि सरकारले नागरिक एपमार्फत लाइसेन्स र राहदानी जस्ता सेवालाई एकीकृत गर्ने योजना ल्याएको छ।

अबको ४५ दिनभित्र सबै सरकारी सेवाहरूलाई एउटै डिजिटल प्रणालीमा आवद्ध गरी आवेदन प्रक्रिया सहज बनाइनेछ।

यो नयाँ प्रणाली कार्यान्वयनमा आएसँगै लाइसेन्सका लागि महिनौँ कुर्नुपर्ने झन्झटिलो अवस्थाको अन्त्य हुने अपेक्षा गरिएको छ।

प्रविधिमैत्री सेवालाई प्राथमिकता दिँदै प्रहरी प्रतिवेदन जस्ता कागजात पनि अब डिजिटल माध्यमबाटै तुरुन्तै प्राप्त गर्न सकिनेछ।