बागलुङ – हरिचौर–मल्म–पाण्डवखानी सडक निर्माण दुई वर्षमा सक्ने सम्झौता भए पनि तीन वर्ष बित्दा पनि पूरा हुन सकेको छैन, जसका कारण स्थानीयहरू समस्यामा परेका छन्।
२०७९ साल भदौमा सम्झौता भएको यो ८ किलोमिटर सडक २०८१ भदौमै सम्पन्न हुनुपर्ने थियो, तर हालसम्म करिब ७० प्रतिशत मात्र काम भएको छ।
निर्माण कम्पनीले समयमै काम नसक्दा दुई पटक म्याद थप गरिएको सडक डिभिजन कार्यालय बागलुङले जनाएको छ। यो ठेक्का वर्ल्डवाइड/लोपूर्ण जेभी कम्पनीले लिएको हो।
स्थानीयले काम ढिलो भएको भन्दै गत कात्तिकमा निर्माण कम्पनीविरुद्ध आन्दोलनसमेत गरेका थिए।
सुरुमा भुक्तानी समस्या देखाउँदै निर्माण व्यवसायीले काममा ढिलाइ गरेको बताइएको छ। सडक निर्माणका लागि २५ करोड २० लाख रुपैयाँमा ठेक्का सम्झौता गरिएको थियो।
यो सडक पूरा भएपछि बागलुङको गलकोट नगरपालिका, बडिगाड गाउँपालिका हुँदै निसीखोला गाउँपालिका सिधा सडक सञ्जालमा जोडिनेछ, जसले आवतजावत सहज बनाउनेछ।
Post Views: 68