भारतमा उत्पादन भएको होन्डाको नयाँ इलेक्ट्रिक एसयूभी “जेरो अल्फा” को परीक्षण सुरु गरिएको छ।
कम्पनीका अनुसार यो गाडी विभिन्न प्रकारका सडक र वातावरणमा परीक्षण गरिँदैछ, जसमा शहर, हाइवे र अप्ठ्यारो बाटोसमेत समावेश छन्। यस क्रममा गाडीको चार्जिङ क्षमता र समग्र प्रदर्शन मूल्यांकन गरिनेछ।
यो इलेक्ट्रिक एसयूभी पहिलो पटक जापान मोबिलिटी शो २०२५ मा प्रस्तुत गरिएको थियो। कम्पनीले यसलाई सन् २०२७ सम्म व्यावसायिक रूपमा उत्पादनमा ल्याउने लक्ष्य राखेको छ।
यो गाडी भारतको राजस्थानस्थित टपुकारा प्लान्टमा उत्पादन हुने बताइएको छ, जहाँ करिब १२०० करोड भारतीय रुपैयाँ लगानी गरिनेछ।
होन्डा इन्डियाका प्रमुख ताकाशी नकाजिमाले भारतमा परीक्षण सुरु हुनु विद्युतीकरणतर्फको महत्वपूर्ण कदम भएको बताएका छन्। उनका अनुसार भारतको विविध भौगोलिक अवस्थाले गाडी परीक्षणका लागि उपयुक्त वातावरण प्रदान गर्छ।
यस परियोजनाबाट स्थानीय रोजगारी सिर्जना हुने र ‘मेक इन इन्डिया’ अभियानलाई समेत सहयोग पुग्ने अपेक्षा गरिएको छ।