Russia–Ukraine War अब केवल सैनिकबीचको प्रत्यक्ष लडाइँमा सीमित नरही उच्च प्रविधिमा आधारित युद्धतर्फ बढिरहेको छ।
आकाशमा जासुसी र आत्मघाती ड्रोनको प्रयोग बढेपछि Ukraine ले अब युद्धमैदानमा सशस्त्र रोबोट अर्थात् मानवरहित ग्राउन्ड भेहिकल (UGV) प्रयोग बढाउने तयारी गरेको जनाएको छ।
युक्रेनी सेनाको के–२ ब्रिगेडका अनुसार यस्ता रोबोटले रुसी आक्रमण रोक्ने, विस्फोटक पदार्थ बोकेर शत्रुका संरचना नष्ट गर्ने र आवश्यक परे शत्रु सैनिकलाई नियन्त्रणमा लिनेसम्मका काम गर्न सक्छन्।
ब्रिगेडका अधिकारी Oleksandr Afanasiev का अनुसार युक्रेनले विश्वमै पहिलो पटक रोबोटहरूको छुट्टै सैन्य एकाइ समेत गठन गरेको छ।
यी रोबोटहरूमा Kalashnikov machine gun जडान गरिएको हुन्छ र मानिसका लागि जोखिमपूर्ण स्थानमा पुगेर आक्रमण गर्न सक्षम हुन्छन्।
ब्याट्रीबाट चल्ने भएकाले जमिनमा चल्दा धेरै आवाज नआउने हुँदा शत्रुले आक्रमणको संकेत पाउन कठिन हुने बताइएको छ।
युक्रेनी अधिकारीहरूका अनुसार केही ठाउँमा त मानव सैनिक प्रत्यक्ष रूपमा नजोडिँदै रुसी र युक्रेनी रोबोटहरूबीच भिडन्तसमेत भएको दाबी गरिएको छ।
तर रोबोटबाट आक्रमण गर्ने अन्तिम निर्णय भने सुरक्षित स्थानमा रहेका अपरेटरहरूले नै लिने व्यवस्था गरिएको छ। अन्तर्राष्ट्रिय मानवीय कानुनका कारण रोबोटलाई पूर्ण स्वतन्त्र रूपमा गोली चलाउने अधिकार दिइएको छैन।
पूर्व युक्रेनी सेनाप्रमुख Valerii Zaluzhnyi का अनुसार हाल यी रोबोटहरू सामग्री ढुवानी र घाइते सैनिकको उद्धारमा बढी प्रयोग भइरहेका छन्।
भविष्यमा भने युद्धमैदानमा यस्ता रोबोटको भूमिका अझै बढ्ने अनुमान गरिएको छ।
युक्रेनले जनशक्ति अभावको अवस्थामा सैनिकको ज्यान जोगाउन रोबोटिक प्रविधि उपयोगी भएको बताएको छ।
उता Russia ले पनि ‘कुरियर’ र ‘लिगुस्का’ नामका आफ्नै रोबोट प्रणाली विकास गरी प्रयोग गरिरहेको जनाइएको छ।
विश्लेषकहरूका अनुसार युद्धमा मानवरहित रोबोटको बढ्दो प्रयोगले भविष्यमा युद्धको स्वरूप नै परिवर्तन हुन सक्ने संकेत देखिएको छ।