म्याग्दीको धवलागिरि गाउँपालिका–२ लमसुङस्थित दरखोलामा मोटरेबल पुल निर्माण सुरु भएको छ।
पूर्वाधार विकास कार्यालय म्याग्दीले ठेक्कामार्फत २५ मिटर लामो पुल बनाउन थालेको हो।
कार्यालयका अनुसार २०८१ भदौ १९ गते ५ करोड ५९ लाख ३३ हजार रुपैयाँमा ठेक्का सम्झौता भएको थियो र निर्माण कम्पनीले यसै महिनादेखि काम थालेको छ।
पुल बनाउन खोलाको धार डाइभर्सन गरी पिल्लर राख्ने ठाउँ तयार पार्ने काम भइरहेको छ।
ठेक्का अवधि १ वर्ष ५ महिना तोकिएको छ। पुल बनेपछि मुना–खोरिया–लमसुङ–लुलाङ–गुर्जा सडकमार्फत धवलागिरि गाउँपालिकाको वडा १ र २ लाई केन्द्रसँग वर्षभर नियमित यातायात सञ्चालन गर्न सहज हुने गाउँपालिकाले जनाएको छ।
अहिले बर्खामा बाढी आएपछि सिधा यातायात बन्द हुने समस्या छ।