नर्वेले नयाँ दर्ता हुने सबै कार विद्युतीय बनाउने आफ्नो लक्ष्य पूरा गरेको छ। पछिल्ला महिनाहरूमा नर्वेमा बिक्री भएका सबै सवारीसाधन विद्युतीय भएका छन्।
सरकारले वर्षौंअगाडिदेखि ईभी खरिदमा कर छुट, भ्याट छुट र सडक शुल्कमुक्त सुविधा जस्ता सहुलियत दिँदै आएको थियो, जसका कारण नर्वे विश्वकै अग्रणी विद्युतीय सवारी बजार बनेको हो।
२०२४ मा नर्वेमा दर्ता भएका नयाँ कारमध्ये ८८.९ प्रतिशत ईभी थिए, भने २०२५ को मध्यतिर यो हिस्सा ९५–९७ प्रतिशतमा पुगेको थियो। अहिले नर्वेमा नयाँ कार बिक्री शतप्रतिशत विद्युतीय भएको छ।
अब सरकारले ईभीमा दिँदै आएको सहुलियत क्रमशः घटाउँदै २०२७ सम्ममा अन्त्य गर्ने योजना बनाएको छ। नर्वेले यो सफलता हासिल गरेर विश्वलाई हरित सवारीतर्फको उदाहरण प्रस्तुत गरेको छ।