पोखरा–मुग्लिन सडक आयोजना अन्तर्गत पोखराको सेती नदीमा बनिरहेको ‘सिग्नेचर’ पुलको काम अहिले सम्म ५० प्रतिशत मात्र सम्पन्न भएको छ।
यो पुलको ठेक्का अवधि तीन वर्षको भए पनि, डिजाइन स्वीकृतिमा ढिलाइ र सामग्री आपूर्ति नपुग्दा काम सुस्त भएको आयोजनाका प्रमुख कृष्णबहादुर कुँवरले बताएका छन्। हालसम्म चार टावरको काम अन्तिम चरणमा पुगेको छ।
निर्माण कम्पनी रसुवा कन्स्ट्रक्सनले चीनबाट केबल ल्याउने तयारी गरेको छ। पुलको काम एसियाली विकास बैंकको ऋण सहयोगमा ९४ करोड रूपैयाँको ठेक्कामा भइरहेको छ।
सिग्नेचर पुल ६ लेनको सडकमा आकर्षक डिजाइन सहित बन्नेछ र पूरा भएपछि पोखराको पर्यटकीय आकर्षण बढ्नेछ। पोखरा–मुग्लिन सडकको पश्चिम खण्डमा हाल ११ पुल बनेका र दुई पुल निर्माणाधीन छन्।