कञ्चनपुरको वेदकोट नगरपालिकाको दैजीदेखि डडेल्धुरा जाने दैजी–जोगबुढा सडक पञ्चायतकालमै ट्रयाक खुले पनि अझै पूर्ण रूपमा निर्माण हुन सकेको छैन।
नार्गाजुन कन्स्ट्रक्सनले सन् २०१७ (२०७४ बैशाख ८) मा २१ करोड २६ लाख रुपैयाँमा १२ किलोमिटर सडक कालोपत्र गर्ने ठेक्का पाएको थियो। तर नौ वर्ष बितिसक्दा पनि केवल पाँच किलोमिटर मात्रै कालोपत्र भएको छ।
२०७६ साउनसम्म सम्पन्न गर्नुपर्ने योजना अहिले पाँचौं पटक म्याद थपिएर पनि अधुरै छ।
गत वर्ष काम नहुँदा एक करोड रुपैयाँ बजेट फ्रीज भएको थियो। यस आर्थिक वर्षमा पनि ५० लाख मात्रै बजेट आएको छ र मर्मत कार्य भइरहेको बताइए पनि प्रगति सुस्त छ।
निर्माण कम्पनीले अहिलेसम्म १८ करोड ३६ लाख रुपैयाँ भुक्तानी पाइसके पनि सात किलोमिटर सडक अझै बाँकी छ।
सडक अधुरो हुँदा स्थानीयले वर्षा र हिउँद दुबैमा सास्ती भोग्दै आएका छन् — हिउँदमा धुलाम्य र बर्खामा जोखिमपूर्ण यात्रा गर्नुपर्ने बाध्यता छ।
यो सडक पूरा भएमा कञ्चनपुरदेखि डडेल्धुरा हुँदै सुदूरपश्चिमका पहाडी जिल्लामा छोटो दूरीमा पुग्न सकिनेछ, तर निर्माणमा ढिलाइले स्थानीय विकासमा ठुलो असर परेको छ।