ट्राफिक प्रहरीले सवारी चालकहरूलाई अत्यावश्यक बाहेक हर्न नबजाउन आग्रह गरेको छ।
काठमाडौँ उपत्यकामा अनावश्यक हर्न प्रयोग गरी ध्वनी प्रदूषण बढेको गुनासो बढेको भन्दै ट्राफिक प्रहरीले यस्तो आग्रह गरेको हो ।
काठमाडौँ उपत्यका ट्राफिक प्रहरी कार्यालयले आज सार्वजनिक सूचना जारी गर्दै हर्नको अत्यधिक प्रयोगले जेष्ठ नागरिक, बालबालिका तथा सर्वसाधारणको स्वास्थ्यमा गम्भीर असर पार्ने उल्लेख गर्दै सवारी चालकहरूलाई सचेत गराएको हो।
सूचनामा भनिएको छ, ’विगत केही समयदेखि काठमाडौँ उपत्यकामा अनावश्यक हर्न बजाई ध्वनी प्रदूषण बढेको जनगुनासो प्राप्त भएको छ।
लाखौं सवारी साधन सञ्चालन हुने उपत्यकामा हर्न प्रयोग गर्दा जनस्वास्थ्यमा नकारात्मक असर पर्न गएको छ।’
कार्यालयले अत्यावश्यक र विशेष परिस्थितिमा मात्र हर्न प्रयोग गर्न र अन्यथा हर्न बजाएमा सवारी तथा यातायात व्यवस्था ऐन, २०४९ को दफा १६४ (१) ३ बमोजिम कारबाही गरिने पनि जनाएको छ।