इटालीको प्रसिद्ध लक्जरी स्पोर्ट्स कार निर्माता कम्पनी फेरारीले आफ्नो इतिहासमै पहिलो पटक पूर्ण रूपमा इलेक्ट्रिक (इभी) कार ‘लुचे’ सार्वजनिक गरेको छ।
५ वर्ष लगाएर विकास गरिएको यो ५ सिट क्षमताको कारको मूल्य ६ लाख ४० हजार डलर (करिब ९ करोड ७५ लाख नेपाली रुपैयाँभन्दा बढी) तोकिएको छ।
यो कारको मुख्य विशेषताहरू यस प्रकार छन्:
एप्पलका पूर्व डिजाइन प्रमुख सर जोनी इभको एजेन्सी ‘लभफ्रम’ सँगको सहकार्यमा यसको डिजाइन तयार पारिएको हो, जसका कारण यो परम्परागत फेरारी कारहरू भन्दा फरक देखिन्छ।
कारको प्रत्येक पाङ्ग्रामा फेरारी आफैँले बनाएको छुट्टाछुट्टै इलेक्ट्रिक मोटर जडान गरिएको छ।
यसले मात्र २.५ सेकेन्डमा ६० माइल प्रतिघण्टाको तीव्र गति समात्न सक्छ।
कम्पनीले यसका सबै पार्टपुर्जाहरू आफैँ उत्पादन गरेकाले भविष्यमा यसको मर्मत गर्न सजिलो हुने र रिसेल भ्यालु (पुनः बिक्री मूल्य) राम्रो हुने दाबी गरेको छ।
नयाँ र फरक लुक्सका कारण सामाजिक सञ्जालमा यो कारको बारेमा मिश्रित प्रतिक्रिया आइरहेका छन्।
कसैले यसलाई ‘डिजाइनको उत्कृष्ट नमुना र गेम चेन्जर’ भनेका छन् भने कसैले फेरारीले आफ्नो पुराना पहिचान र विरासत बिगारेको भन्दै आलोचना गरेका छन्।
तर फेरारीका मुख्य डिजाइन अधिकारी फ्लाभियो मान्जोनीले नयाँ र फरक डिजाइन आउँदा सुरुमा यस्तो आलोचना हुनु स्वाभाविक भएको र आगामी दिनमा मानिसहरूले यसको महत्त्व बुझ्ने बताएका छन्।
