जेएलआरको ‘बेबी डिफेन्डर’ सन् २०२७ देखि उत्पादन हुने

काठमाडाैं । जेएलआरका प्रमुख कार्यकारी अधिकृत (सीईओ) पीबी बालाजीले कम्पनीको दोस्रो त्रैमासिक वित्तीय नतिजासम्बन्धी छलफलका क्रममा सन् २०२७ देखि बेबी डिफेन्डरको उत्पादन सुरु हुने पुष्टि गरेका हुन् ।

कम्पनीले नयाँ एसयूभीको औपचारिक नाम भने सार्वजनिक गरिसकेको छैन । यसको सार्वजनिक प्रस्तुति सन् २०२६ को अन्त्यसम्ममा हुन सक्ने अनुमान गरिएको छ ।

डिफेन्डर लाइनअपमा नयाँ मोडल

नयाँ बेबी डिफेन्डर हाल बजारमा उपलब्ध डिफेन्डर ९०, ११० र १३० भन्दा आकारमा सानो हुनेछ । यसको नाम ‘डिफेन्डर स्पोर्ट इलेक्ट्रिक’ वा ‘डिफेन्डर ८०’ हुन सक्ने चर्चा भए पनि कम्पनीले कुनै नाम निश्चित गरेको छैन ।

जेएलआरको ‘हाउस अफ ब्रान्ड्स’ रणनीतिअन्तर्गत डिफेन्डरलाई छुट्टै ब्रान्डका रूपमा स्थापित गरेपछि आउन लागेको यो पहिलो पूर्ण नयाँ मोडल हुनेछ ।

नयाँ एसयूभी कम्पनीकै इलेक्ट्रिक मोड्युलर आर्किटेक्चर (ईएमए) प्लेटफर्ममा निर्माण हुनेछ । यही प्लेटफर्ममा आगामी रेन्ज रोभर इलेक्ट्रिक जीटी पनि उत्पादन गरिनेछ । यसको लम्बाइ ४.५ मिटरभन्दा केही बढी हुने र फोर ह्वील ड्राइभ सिस्टम उपलब्ध हुने अनुमान छ । यद्यपि, मोटर, ब्याट्री क्षमता र ड्राइभिङ रेन्जबारे कम्पनीले थप विवरण सार्वजनिक गरेको छैन ।

हाइब्रिड संस्करण पनि ल्याइने

जेएलआरले बेबी डिफेन्डरको विद्युतीय संस्करणसँगै हाइब्रिड भर्सनसमेत बजारमा ल्याउने तयारी गरेको छ । सीईओ बालाजीका अनुसार हाइब्रिड मोडलको विकास कार्य अघि बढिरहेको छ । तर, यसको बजार प्रवेश विद्युतीय संस्करणको तुलनामा केही ढिलो हुनेछ ।

डिफेन्डर तथा डिस्कभरी ब्रान्डका प्रबन्ध निर्देशक मार्क क्यामरुनले नयाँ मोडलमा डिफेन्डरको मुख्य पहिचान मानिने अफरोड क्षमता कायम राखिने बताएका छन् ।

यद्यपि, विद्युतीय प्लेटफर्म र गाडीको तल्लो भागमा रहने ब्याट्रीका कारण अहिलेका डिफेन्डर मोडलको तुलनामा नयाँ एसयूभीको ह्वील ट्राभल तथा सस्पेन्सन आर्टिकुलेसन केही सीमित हुन सक्नेछ ।

रेन्ज रोभर लाइनअपमा पनि फेरबदल

जेएलआरले सन् २०२७ देखि नयाँ रेन्ज रोभर जीटीको उत्पादनसमेत सुरु गर्ने योजना बनाएको छ । हाल हेलवुड प्लान्टमा रेन्ज रोभर इभोक र डिस्कभरी स्पोर्ट उत्पादन हुँदै आएका छन् ।

नयाँ रेन्ज रोभर जीटीले डिस्कभरी स्पोर्टको स्थान लिनेछ । त्यस्तै, सन् २०२७ को पछिल्लो समयसम्म रेन्ज रोभर इभोकको उत्पादन बन्द गर्ने कम्पनीको तयारी छ । रेन्ज रोभर भेलारलाई समेत उत्पादनबाट हटाउने योजना बनाइएको छ ।

नयाँ विद्युतीय तथा हाइब्रिड मोडलको विकाससँगै जेएलआरले आफ्नो लक्जरी एसयूभी पोर्टफोलियोलाई नयाँ स्वरूप दिने तयारी गरेको छ । आगामी वर्षदेखि उत्पादन लाइनअपमा परिवर्तन गर्दै कम्पनीले विद्युतीय प्रविधिमा आधारित नयाँ पुस्ताका एसयूभीलाई प्राथमिकता दिने रणनीति अघि बढाएको छ ।

Leave a Reply

Your email address will not be published. Required fields are marked *