ललितपुरको कुसुन्तीमा पैदलयात्रीलाई व्यस्त चक्रपथ सुरक्षित रूपमा वारपार गर्न सहज बनाउने उद्देश्यले निर्माण गरिएको लिफ्टसहितको आकाशे पुल सञ्चालनमा ल्याउने तयारी गरिएको छ। करिब चार करोड ६८ लाख रुपैयाँ लागतमा निर्माण भइरहेको पुल प्राविधिक समस्या र प्रक्रियागत जटिलताका कारण निर्धारित समयमा सम्पन्न हुन नसकेको हो।
ललितपुर महानगरपालिका–१३ स्थित चक्रपथ क्षेत्रमा निर्माण भइरहेको पुलमा दुवैतर्फ लिफ्टको सुविधा राखिएको छ। यसले विशेषगरी ज्येष्ठ नागरिक, अपांगता भएका व्यक्ति, बिरामी तथा बालबालिकालाई सिँढी चढ्नुपर्ने बाध्यताबिना सडक पार गर्न सहज बनाउने अपेक्षा गरिएको छ।
२०८० फागुनमा निर्माण सुरु भएको पुल सम्झौताअनुसार एक वर्षभित्र सम्पन्न गर्ने लक्ष्य राखिएको थियो। तर, निर्माणका क्रममा देखिएका विभिन्न प्राविधिक समस्या तथा प्रक्रियागत जटिलताले काम निर्धारित समयमै पूरा हुन सकेन।
पुललाई छठ पर्वअघि वा त्यसलगत्तै सञ्चालनमा ल्याउने लक्ष्य राखिए पनि उद्घाटन तथा सञ्चालनको निश्चित मिति भने सार्वजनिक गरिएको छैन।
व्यस्त चक्रपथमा सवारीसाधनको चापका कारण पैदलयात्रीलाई सडक पार गर्न कठिनाइ हुने गरेको छ। यस्तो अवस्थामा आकाशे पुल सञ्चालनमा आएपछि पैदलयात्रीलाई सुरक्षित रूपमा बाटो काट्न सहज हुने र सम्भावित दुर्घटनाको जोखिम न्यूनीकरणमा सहयोग पुग्ने अपेक्षा गरिएको छ।
विशेषगरी कुसुन्ती हाइट तथा आसपासका क्षेत्रमा आवतजावत गर्ने नागरिकलाई पुलले प्रत्यक्ष लाभ पुर्याउने विश्वास गरिएको छ। लिफ्टको व्यवस्थाले शारीरिक रूपमा असहजता भएका व्यक्तिको आवागमन सहज बनाउनुका साथै सार्वजनिक पूर्वाधारलाई सबैका लागि पहुँचयोग्य बनाउने दिशामा पनि सहयोग पुग्ने देखिन्छ।
निर्माण सम्पन्न भएर सञ्चालनमा आएपछि कुसुन्ती क्षेत्रमा पैदलयात्रीको सडक वारपार गर्ने समस्या कम हुने अपेक्षा गरिएको छ। यद्यपि, पुल सञ्चालनको औपचारिक मिति सार्वजनिक हुन बाँकी छ।
