काठमाडौं । राइड सेयरिङ तथा डेलिभरी सेवा प्रदायक इनड्राइभले नेपालमा चालक साझेदारको सडक सुरक्षा र व्यावसायिक व्यवहार सुधार गर्ने उद्देश्यले सञ्चालन गरेको अनलाइन तालिममा १,५०० भन्दा बढी चालक सहभागी भएका छन्। कम्पनीका अनुसार चालकलाई दैनिक कामका क्रममा आइपर्न सक्ने जोखिम र चुनौती सामना गर्न आवश्यक व्यावहारिक ज्ञान दिने उद्देश्यले तयार पारिएको उक्त तालिम सफलतापूर्वक पूरा गर्ने चालकले डिजिटल प्रमाणपत्रसमेत प्राप्त गरेका छन्।
मोबाइलबाटै सजिलै पूरा गर्न सकिने गरी तयार पारिएको यो तालिमले चालकलाई सुरक्षित रूपमा सवारी सञ्चालन गर्न, यात्रुसँग व्यावसायिक व्यवहार कायम राख्न र यात्राका क्रममा उत्पन्न हुन सक्ने विभिन्न परिस्थितिको उचित व्यवस्थापन गर्न सहयोग पुर्याउने लक्ष्य राखेको छ।
करिब २० मिनेटमा पूरा गर्न सकिने तालिममा गैर–प्लेटफर्म सुरक्षा तथा व्यावसायिक सीमाहरू, राइड–हेलिङ सेवाका लागि सडक सुरक्षासम्बन्धी आधारभूत ज्ञान र आपत्कालीन अवस्था, रिपोर्टिङ तथा एसओएस सुविधाको प्रयोग गरी तीनवटा मुख्य मोड्युल समावेश गरिएको छ।
पहिलो मोड्युलमा चालकले प्लेटफर्मबाहिरका परिस्थितिमा समेत अपनाउनुपर्ने सुरक्षा सावधानी, व्यावसायिक सीमाको पहिचान र यात्रुसँग जिम्मेवार व्यवहार कायम राख्ने विषयमा जानकारी प्राप्त गर्छन्। यसले चालकलाई आफ्नो कामका क्रममा व्यावसायिक मर्यादा कायम राख्न र सम्भावित जोखिमप्रति सचेत रहन सहयोग गर्ने उद्देश्य राखेको छ।
त्यस्तै, दोस्रो मोड्युलमा राइड–हेलिङ सेवासँग सम्बन्धित सडक सुरक्षाका आधारभूत पक्षलाई समेटिएको छ। वास्तविक सडक परिस्थितिलाई ध्यानमा राखेर तयार पारिएको यस भागमा जोखिमपूर्ण अवस्थाबाट बच्ने उपाय, अपरिचित स्थानमा अपनाउनुपर्ने सावधानी र दैनिक यात्रामा उपयोगी सडक सुरक्षा अभ्यासबारे जानकारी दिइएको छ।
तेस्रो मोड्युल आपत्कालीन अवस्थामा चालकले लिनुपर्ने कदमसँग सम्बन्धित छ। यसमा रिपोर्टिङ प्रक्रिया, एसओएस सुविधाको प्रयोग र कुनै अप्रत्याशित घटना आइपर्दा उपयुक्त माध्यमबाट सहयोग प्राप्त गर्ने तरिकाबारे जानकारी समावेश गरिएको छ। चालकलाई कठिन परिस्थितिमा शान्त, सुरक्षित र प्रभावकारी ढंगले प्रतिक्रिया दिन सक्षम बनाउने उद्देश्यले यो भाग तयार पारिएको कम्पनीले जनाएको छ।
चालकको दैनिक कामसँग जोडिएको सुरक्षा ज्ञान
इनड्राइभ नेपालकी सिनियर ड्राइभर अपरेसन स्पेसलिस्ट सुजिता जिमी राईले १,५०० भन्दा बढी चालकले तालिम पूरा गर्नु महत्वपूर्ण उपलब्धि भएको बताएकी छन्। उनका अनुसार चालकहरू दैनिक लामो समय सडकमा बिताउने भएकाले उनीहरूले विभिन्न प्रकारका परिस्थितिको सामना गर्नुपर्ने हुन्छ।
राईले तालिममार्फत चालकलाई व्यवहारमा प्रयोग गर्न सकिने सुरक्षा जानकारी उपलब्ध गराउनु आवश्यक रहेको बताउँदै यसले उनीहरूलाई कामका क्रममा थप सचेत रहन सहयोग गर्ने उल्लेख गरेकी छन्। उनका अनुसार चालकले यात्राका क्रममा आइपर्ने अवस्थाबारे सही जानकारी राख्दा आफ्नो दैनिक काम सुरक्षित र व्यवस्थित रूपमा पूरा गर्न सक्नेछन्।
कम्पनीकी कन्ट्री कन्टेक्स्ट म्यानेजर मञ्जिता गुरुङले चालक साझेदारको नियमित काममा अवरोध नहोस् भन्ने उद्देश्यले तालिमलाई सरल, छोटो र सहज रूपमा पूरा गर्न सकिने बनाइएको बताएकी छन्।
उनका अनुसार चालकले दैनिक जिम्मेवारीसँगै सुरक्षा र व्यावसायिक व्यवहारसम्बन्धी जानकारी प्राप्त गर्न सकून् भन्ने हेतुले तालिमको संरचना तयार गरिएको हो। उनले चालकको दैनिक कार्यशैलीमा यस्तो तालिमले सकारात्मक प्रभाव पार्न सक्ने बताएकी छन्।
चालकको अनुभव : सडक सुरक्षा र आपत्कालीन तयारीमा उपयोगी
तालिम पूरा गरेका इनड्राइभका मोटरसाइकल चालक साझेदार विशाल पाहिनीले दैनिक लामो समय मोटरसाइकल चलाएर सडकमा बिताउने भएकाले तालिमले सामान्य ठानिने सुरक्षा नियमको महत्व पुनः सम्झाएको बताएका छन्।
उनका अनुसार सडक सुरक्षाका सामान्य नियम, आपत्कालीन अवस्था र एसओएस सुविधासम्बन्धी जानकारी चालकका लागि व्यावहारिक रूपमा उपयोगी छन्। उनले आवश्यक परेको समयमा सम्बन्धित जानकारी प्राप्त गर्न सक्ने र कुनै समस्या आएमा कसरी अघि बढ्ने भन्ने विषयमा स्पष्टता मिलेको बताएका छन्।
त्यस्तै, इनड्राइभका अन्य चालक साझेदार कमल बिमिरेले सुरक्षित ड्राइभिङ भन्नाले सावधानीपूर्वक सवारी चलाउनु मात्र नभई यात्रुसँग उचित संवाद गर्न र व्यावसायिक व्यवहार कायम राख्नुसमेत बुझिने बताएका छन्।
बिमिरेका अनुसार यात्राका क्रममा विभिन्न परिस्थिति उत्पन्न हुन सक्छन्, जसलाई सही तरिकाले व्यवस्थापन गर्न चालकले आवश्यक ज्ञान राख्नुपर्छ। उनले तालिम सरल, उपयोगी र दैनिक कामसँग प्रत्यक्ष सम्बन्धित रहेको उल्लेख गरेका छन्।
इनड्राइभले चालक साझेदारको सुरक्षा र व्यावसायिक विकासलाई प्राथमिकतामा राख्दै आगामी दिनमा पनि यस्ता तालिम तथा सचेतनामूलक कार्यक्रमलाई निरन्तरता दिने जनाएको छ। कम्पनीका अनुसार चालकको सुरक्षा ज्ञान अभिवृद्धि गर्नुका साथै यात्रु सेवा र व्यावसायिक व्यवहारलाई थप व्यवस्थित बनाउने दिशामा यस्ता कार्यक्रम सञ्चालन गरिनेछ।
