फक्सवागन पोलो अब विद्युतीय अवतारमा -

फक्सवागनले विश्व बजारमा आफ्नो चर्चित ह्याचब्याक ‘पोलो’ को पूर्ण विद्युतीय संस्करण ‘ID.Polo’ सार्वजनिक गरेको छ।

जर्मनीमा करिब २४,९९५ युरो (करिब नेरु ३६ लाखभन्दा बढी) बाट सुरु हुने यो गाडीले एक पटकको फुल चार्जमा ४५४ किलोमिटरसम्मको रेन्ज दिने दाबी गरिएको छ।

डिजाइन र बनावट: नयाँ ID.Polo परम्परागत पोलो जस्तै देखिए पनि यसमा ईभीका लागि विशेष ‘क्लोज्ड ग्रिल’ र ‘एयरो अलोय ह्वील’ हरू राखिएका छन्। यो ४ मिटर लामो छ र यसमा ४४१ लिटरको ठूलो बुट स्पेस (Boot Space) उपलब्ध छ।
आधुनिक क्याबिन: यसको भित्री भागमा १३-इन्चको ठूलो इन्फोटेनमेन्ट स्क्रिन र १०-इन्चको इन्स्ट्रुमेन्ट क्लस्टर छ। प्रिमियम भेरियन्टहरूमा पानोरामिक ग्लास रूफ, १२-वे पावर्ड सिट र मसाज फङ्सन जस्ता विलासी सुविधाहरू पनि समावेश छन्।
शक्तिशाली ब्याट्री र चार्ज: यो दुईवटा ब्याट्री विकल्पमा उपलब्ध छ। ३७ किलोवाट घण्टाको ब्याट्रीले ३२९ किलोमिटर र ५२ किलोवाट घण्टाको ब्याट्रीले ४५४ किलोमिटरको रेन्ज दिन्छ। फास्ट चार्जरको मद्दतले यसलाई २४ मिनेटमै १० देखि ८० प्रतिशतसम्म चार्ज गर्न सकिन्छ।
तीनवटा पावर विकल्प: ग्राहकले आफ्नो आवश्यकता अनुसार ११४ बीएचपी, १३३ बीएचपी र २०८ बीएचपी मध्ये कुनै एक इन्जिन क्षमता रोज्न पाउनेछन्। यसमा ‘वन-पेडल ड्राइभ’ मोड पनि दिइएको छ, जसले शहरको ट्राफिकमा चलाउन सजिलो बनाउँछ।
बजारको चुनौती: उच्च मूल्यका कारण यो गाडी नेपाल र भारत जस्ता बजारमा सार्वजनिक हुने सम्भावना कम छ। यो मूल्यमा ग्राहकहरूले ह्याचब्याकको सट्टा एसयूभी (SUV) रोज्ने गरेकाले कम्पनीले यसलाई केवल प्रदर्शनीको रूपमा मात्र ल्याउन सक्ने देखिएको छ।