म्याग्दीको सडक योजना समयअघि नै सम्पन्न

म्याग्दीको मंगला गाउँपालिकास्थित चन्निका घुम्ती-कुहुँ सडक स्तरोन्नतिको काम तोकिएको समयभन्दा डेढ महिनाअघि नै सम्पन्न भएको छ।

जेठ १५ गतेसम्मको म्याद भए तापनि निर्माण कम्पनी मंगला कन्ट्रक्सनले चैत महिनामै काम सकेर सकारात्मक उदाहरण प्रस्तुत गरेको छ।

गण्डकी प्रदेश सरकारको ५० लाख रुपैयाँ बजेटमा सञ्चालित यस योजना अन्तर्गत सडक फराकिलो पार्ने, नाली निर्माण र ग्याबियन पर्खाल लगाउने कार्यहरू भएका छन्।

सडक सुधार र घुम्ती व्यवस्थापन भएपछि कुहुँका बासिन्दालाई सवारी साधन आवतजावत गर्न र गाडी फर्काउन निकै सहज भएको छ।

निर्माण व्यवसायी चक्रलाल पाण्डेले इन्धन र सामग्रीको मूल्यवृद्धि भए तापनि तीव्र रूपमा काम गरेर योजना सम्पन्न गरेको जानकारी दिए।

पूर्वाधार विकास कार्यालयका अनुसार यस वर्ष म्याग्दीमा अन्य दुईवटा सडक योजनाहरू पनि लक्ष्यअघि नै सम्पन्न भएका छन्।

प्रदेशसभा सदस्य रेशमबहादुर जुग्जाली र इन्जिनियर महेन्द्र बानियाँले अनुगमनका क्रममा व्यवसायीको सक्रियताको प्रशंसा गरेका छन्।