बोलेरो म्याक्स सार्वजनिक

भरतपुर । महिन्द्रा कम्पनीका आधिकारिक वितरक चितवन अटो जोन प्रालिले भरतपुरमा नयाँ क्षमताका बोलेरो म्याक्स पिकअप गाडी सार्वजनिक गरेको छ।

बिहीबार भरतपुर महानगरपालिका–१०, हाकिमचोकस्थित अटो सेन्टरबाट दुई टन तथा एक टन सात क्विन्टल भार क्षमता भएका दुई वटा पिकअप मोडेल औपचारिक रूपमा बजारमा ल्याइएको हो।

नेपालको भौगोलिक अवस्था, सडक संरचना र व्यावसायिक आवश्यकतालाई ध्यानमा राख्दै महिन्द्राले नयाँ मोडेलका बोलेरो म्याक्स पिकअप सार्वजनिक गरेको कम्पनीले जनाएको छ।

विशेषगरी कृषि, निर्माण तथा साना–मझौला उद्योग व्यवसायमा संलग्न उद्यमीहरूलाई लक्षित गरी ल्याइएका यी गाडीहरूले दैनिक ढुवानी कार्यलाई सहज बनाउने विश्वास गरिएको छ।

चितवन अटो जोन प्रालिका अध्यक्ष राजेन्द्र बटाजुले महिन्द्राको लामो समयदेखिको अनुभव र प्रयोगकर्ताबाट प्राप्त प्रतिक्रिया अनुसार यी पिकअपहरू विकास गरिएको बताए।

उनका अनुसार बोलेरो म्याक्स पिकअपले विश्वसनीयता, मजबुती र कार्यक्षमताका कारण नेपाली बजारमा आफ्नो छुट्टै पहिचान बनाउन सफल भएको छ।

‘बोलेरो म्याक्सले उच्चस्तरको क्षमता, भरपर्दोपन र सुरक्षालाई प्राथमिकतामा राख्दै आफूलाई एक बहुउपयोगी पिकअपका रूपमा स्थापित गरिसकेको छ,’ उनले भने, ‘विशेषगरी कम सञ्चालन खर्च र उच्च माइलेजका कारण चालक तथा उद्योगी–व्यवसायीहरूको रोजाइमा यो गाडी पर्न थालेको छ।’

उनका अनुसार ग्रामीण भेगदेखि सहरी क्षेत्रमा समेत सहज रूपमा सञ्चालन गर्न सकिने गरी डिजाइन गरिएका यी गाडीहरू नेपालको उकालो–ओरालो तथा कच्ची सडकका लागि उपयुक्त छन्।

कृषिजन्य उत्पादन, निर्माण सामग्री तथा दैनिक उपभोग्य वस्तु ढुवानीमा यसको प्रयोग प्रभावकारी हुने अपेक्षा गरिएको छ।

अटो जोनका व्यवस्थापक राजकुमार बरालले बोलेरो म्याक्स पिकअपको संरचनात्मक मजबुती यसको मुख्य विशेषता भएको बताए।

‘यसमा प्रयोग गरिएको च्यासिस निकै बलियो छ भने बडी संरचना पनि टिकाउ किसिमको बनाइएको छ,’ उनले भने, ‘त्यसैले भारी सामान बोकेर लामो दूरीसम्म यात्रा गर्दा पनि गाडीले राम्रो प्रदर्शन गर्छ।’

बरालका अनुसार निर्माण क्षेत्रमा प्रयोग हुने सामग्री जस्तै बालुवा, ढुंगा, सिमेन्ट लगायतका वस्तु ढुवानीका लागि यो गाडी उपयुक्त रहेको छ।

साथै कृषकहरूले उत्पादन गरेका तरकारी, फलफूल, अन्नबाली लगायतका कृषिजन्य वस्तु बजारसम्म पुर्‍याउन पनि यो गाडी निकै उपयोगी हुने विश्वास गरिएको छ।

कम्पनीका अनुसार दुई टन भार क्षमताको बोलेरो म्याक्स पिकअपको सुरुवाती मूल्य ३२ लाख ९५ हजार रुपैयाँ तोकिएको छ भने एक टन सात क्विन्टल क्षमताको मोडेलको मूल्य २९ लाख ९५ हजार रुपैयाँबाट सुरु हुन्छ।

ग्राहकको आवश्यकता अनुसार विभिन्न भेरियन्ट तथा फाइनान्स सुविधासमेत उपलब्ध गराइने कम्पनीले जनाएको छ।

पछिल्लो समय नेपालमा साना तथा मझौला व्यवसायहरू विस्तार हुँदै गइरहेका छन्। त्यस्तै, कृषि क्षेत्र पनि व्यवसायिक हुँदै जाँदा ढुवानीका लागि भरपर्दा सवारी साधनको माग बढ्दै गएको छ।

यस्तो अवस्थामा बोलेरो म्याक्स पिकअपजस्ता गाडीहरूले बजारमा राम्रो सम्भावना देखाएको व्यवसायीहरू बताउँछन्।

चितवन अटो जोन प्रालिले ग्राहकलाई सहज सेवा उपलब्ध गराउन बिक्रीपश्चात सेवा (आफ्टर सेल्स सर्भिस) लाई समेत प्राथमिकता दिएको जनाएको छ।

स्पेयर पार्ट्सको उपलब्धता, दक्ष प्राविधिक सेवा र नियमित मर्मतसम्भार सुविधा प्रदान गरिने हुँदा ग्राहकले दीर्घकालीन रूपमा लाभ लिन सक्ने विश्वास कम्पनीको छ।

यस किसिमका पिकअप गाडीहरूले ग्रामीण अर्थतन्त्रलाई चलायमान बनाउन महत्वपूर्ण भूमिका खेल्ने अपेक्षा गरिएको छ।

किसानदेखि निर्माण व्यवसायी, खुद्रा व्यापारीदेखि थोक वितरकसम्मका लागि उपयोगी हुने भएकाले बोलेरो म्याक्स पिकअप आगामी दिनमा नेपाली बजारमा अझ लोकप्रिय बन्ने अनुमान गरिएको छ।

समग्रमा, नयाँ प्रविधि, मजबुत संरचना, उच्च भार क्षमता र किफायती सञ्चालन खर्चका कारण बोलेरो म्याक्स पिकअपले नेपाली बजारमा आफ्नो उपस्थिति अझ सशक्त बनाउने देखिन्छ।

व्यवसायिक प्रयोजनका लागि भरपर्दो विकल्प खोजिरहेका उपभोक्ताका लागि यो गाडी आकर्षक विकल्पका रूपमा स्थापित हुने अपेक्षा गरिएको छ।