चितवनमा होण्डा गाडीको अत्याधुनिक सर्भिस सेन्टर

होण्डा गाडीको नेपालका लागि आधिकारिक बिक्रेता स्याकार ट्रेडिङ कम्पनी प्रालिको आधिकारिक सर्भिस सेन्टरका रूपमा चितवनमा होण्डा कारका ग्राहकलाई लक्षित गर्दै जेन्युन अटो वर्ल्डले अत्याधुनिक सुविधा सम्पन्न सर्भिस सेन्टर शुभारम्भ गरेको छ।

यसअघि जेन्युन अटोले टोयोटा ब्रान्डका कार तथा गाडीहरूको सर्भिस तथा स्पेयर पार्ट्स सेवा विगत १५ वर्षदेखि प्रदान गर्दै आएको जेन्युन अटो वर्ल्डका अध्यक्ष इन्द्र रेग्मीले जानकारी दिनुभयो।

अब दुवै जापानी ब्रान्डका कार तथा गाडीहरूको सर्भिस एकै स्थानमा उपलब्ध हुने उहाँले बताउनुभयो।

जेन्युन अटो वर्ल्डको अत्याधुनिक सर्भिस सेन्टरको उद्घाटन स्याकार ट्रेडिङ कम्पनीका अध्यक्ष सौरभ ज्योती तथा प्रबन्ध निर्देशक सिर्जना जोशीले संयुक्त रूपमा रिबन काटेर गर्नुभएको थियो।

होण्डा ग्राहकलाई मध्यनजर गर्दै बागमती प्रदेशअन्तर्गत चितवन आसपासका शहरहरूलाई लक्षित गरी होण्डासँग सहकार्यमा यो सर्भिस सेन्टर सुरु गरिएको जेन्युन अटो वर्ल्डका अध्यक्ष रेग्मीले स्पष्ट पार्नुभयो।

सो अवसरमा बोल्दै स्याकार ट्रेडिङका अध्यक्ष सौरभ ज्योतीले ग्राहकको मागलाई ध्यानमा राख्दै जेन्युन अटोसँगको सहकार्यमा सञ्चालनमा आएको सर्भिस सेन्टरले स्पेयर पार्ट्स र सर्भिसमा विशेष ध्यान दिने बताउनुभयो।

साथै नयाँ कारको लन्चसँगै चितवनमा सोरूम पनि छिट्टै सञ्चालनमा ल्याइने जानकारी दिनुभयो।

यसैबीच शुभारम्भसँगै सर्भिस सेन्टरमा तीनदिने निःशुल्क सर्भिस क्याम्प पनि सुरु गरिएको छ। क्याम्पअन्तर्गत लेबर चार्जमा २० प्रतिशत, पार्ट्समा ७ प्रतिशत, ल्युबमा ५ प्रतिशत छुट प्रदान गरिएको छ।

साथै एचडीएस स्क्यानिङ तथा २००१ मोडेलदेखि २०१४ मोडेलसम्मका तोकिएका गाडीहरूमा होण्डा सेफ्टी रिकलबमोजिम निःशुल्क एयर ब्याग परिवर्तन गरिएको छ। भविष्यमा पनि यस्तै प्रकारका ग्राहक लक्षित सेवा प्रदान गरिने कम्पनीले जनाएको छ।

क्याम्पअवधिमा ग्राहकहरूले गाडीको सर्भिसिङ तथा स्क्यानिङ, एयर ब्याग, ब्याट्री हेल्थ चेकअप, टायर निरीक्षणसहित ३२ बुँदे निरीक्षण निःशुल्क रूपमा गराउन सक्नेछन्।