त्रिभुवन विश्वविद्यालयमा ‘हिमालयन रिम क्षेत्रीय चलचित्र प्रदर्शनी–२०२५’ आइतबारदेखि औपचारिक रूपमा सुरु भएको छ।
नेपालमा पहिलोपटक आयोजना गरिएको यस प्रदर्शनीले चिनियाँ एनिमेसन र डिजिटल सिर्जनालाई सीमापार सांस्कृतिक संवादको माध्यमका रूपमा प्रस्तुत गरेको छ।
“सभ्यतागत पारस्परिक सिकाइ, प्रविधिगत नवप्रवर्तन” भन्ने नारासहित आयोजित कार्यक्रममा चलचित्र प्रदर्शन, सिर्जनात्मक कार्यशाला, सांस्कृतिक प्रदर्शनी तथा अन्तरक्रियात्मक छलफलहरू समावेश छन्।
आयोजकका अनुसार प्रदर्शनीको मुख्य उद्देश्य विश्वविद्यालयका विद्यार्थीहरूलाई चिनियाँ प्रविधि र नवप्रवर्तनबारे जानकारी गराउनु हो।
त्रिभुवन विश्वविद्यालयको आमसञ्चार तथा पत्रकारिता विभागमा आयोजित उद्घाटन सत्र आधुनिक प्रविधिमैत्री प्रस्तुतीकरणबाट सुरु भएको थियो।
एआई (कृत्रिम बुद्धिमत्ता) प्रयोग गरेर तयार गरिएको प्रवर्द्धनात्मक भिडियोपछि पूर्ण रूपमा एआईद्वारा निर्माण गरिएको एनिमेटेड सर्ट फिल्म ‘द स्पिरिट अफ द माउन्टेन्स’ प्रदर्शन गरिएको थियो।
चिनियाँ अमूर्त सांस्कृतिक सम्पदामा पर्ने ‘क्वानसिङ तुओ’ (पूर्ण आकारको रबिङ कला) बाट प्रेरित यस फिल्मले परम्परागत सांस्कृतिक स्वरूपलाई एआई प्रविधिमार्फत कसरी पुनःव्याख्या गर्न सकिन्छ भन्ने सन्देश दिएको छ।
फिल्मका निर्देशक पाङ जियाले भिडियो लिंकमार्फत सहभागिता जनाउँदै एआई आधारित दृश्य निर्माण प्रक्रियाबारे जानकारी दिएका थिए। निर्माता जुनयान ह्वाङले प्रत्यक्ष प्रश्नोत्तर सत्रमा सहभागी हुँदै कार्यक्रमलाई अझ जीवन्त बनाएका थिए।
यस अवसरमा ‘द लिजेन्ड अफ हेइ २’ पनि प्रदर्शन गरिएको थियो, जसले ठूलो संख्यामा विद्यार्थीलाई आकर्षित गर्यो।
‘गतिशील स्टोरीबोर्ड प्रि–भिजुअलाइजेसन’ प्रविधि प्रयोग गरिएको उक्त फिल्मले मानव र प्रकृतिबीचको सहअस्तित्वको कथा प्रस्तुत गर्छ।
प्रकृति र मानवबीचको सामञ्जस्यलाई केन्द्रमा राखिएको यसको पर्यावरणीय सन्देशले विद्यार्थी दर्शकमाझ गहिरो प्रभाव पारेको सहभागीहरूले बताएका छन्।
फिल्म प्रदर्शनपछि आयोजित ‘ब्लाइन्ड बक्स’ अन्तरक्रियात्मक गतिविधिले कार्यक्रमलाई थप उत्साहपूर्ण बनाएको थियो, जहाँ विद्यार्थीहरूले प्रश्नोत्तरमा सहभागी भई विभिन्न सामग्री जित्ने अवसर पाए।
प्राध्यापक तथा विद्यार्थीहरूले प्रदर्शनीलाई सकारात्मक रूपमा स्वागत गर्दै यसले नेपाल–चीन सांस्कृतिक सम्बन्धलाई थप सुदृढ बनाउने विश्वास व्यक्त गरेका छन्।
सहभागीहरूका अनुसार यो कार्यक्रम मनोरञ्जनमा मात्र सीमित नभई चिनियाँ एनिमेसन प्रविधि र डिजिटल उत्पादन मोडेल बुझ्ने महत्वपूर्ण अवसर बनेको छ।
धेरै विद्यार्थीहरूले भविष्यमा नेपाल र चीनबीच डिजिटल सिर्जनात्मकता तथा एनिमेसन क्षेत्रमा सहकार्यको सम्भावनाप्रति चासो देखाएका छन्।
