बैतडीमा ट्रकको ठक्करबाट पैदलयात्रा गरिरहेका एक वृद्धको मृत्यु भएको छ।
जिल्ला प्रहरी कार्यालय बैतडीका प्रवक्ता प्रहरी निरीक्षक बलदेव बडुका अनुसार शुक्रबार राति मिनी टाटा ट्रकले सतबाझ–श्रीभाबर भित्री सडक खण्डमा ब्याक गर्ने क्रममा स्थानीय सुर्नया गाउँपालिका–५ का ८१ वर्षीय महावीर विष्टलाई ठक्कर दिएको थियो।
ट्रकको ठक्करबाट घाइते भएका उनलाई उपचारका लागि धनगढी ल्याउने क्रममा बाटोमै मृत्यु भएको प्रहरी निरीक्षक बडुले जानकारी दिए।
उनका अनुसार ठक्कर दिने सुपप्र ०१–००१ क १८१३ नम्बरको ट्रक र ट्रक चालक घटना पछि प्रहरीको नियन्त्रणमा छन्।
चालक सुर्नया गाउँपालिका–२, ग्वानी निवासी ३१ वर्षीय मानसिंह विष्ट रहेका छन्।