टेस्ला कम्पनीका प्रमुख इलन मस्कले अमेरिकी राष्ट्रपति डोनाल्ड ट्रम्पको प्रशासनमा आफ्नो भूमिका घटाउने निर्णय गरेका छन्।
२०२५ को पहिलो त्रैमासमा टेस्लाको आम्दानी र मुनाफा उल्लेखनीय रूपमा घटेपछि उनले यस्तो निर्णय लिएका हुन्।
कम्पनीले सार्वजनिक गरेको विवरण अनुसार गाडी बिक्रीको आम्दानी गत वर्षको सोही अवधिको तुलनामा २० प्रतिशतले घटेको छ, र मुनाफा ७० प्रतिशतभन्दा बढीले घटेको छ।
पहिलो त्रैमासमा कम्पनीको कुल आम्दानी १९.३ अर्ब डलर रहेको छ, जुन विश्लेषकहरूले अनुमान गरेको २१.१ अर्ब डलरभन्दा कम हो।
मस्कले ट्रम्पको निर्वाचन अभियानका लागि एक अर्ब डलरभन्दा बढी सहयोग गरेका थिए र अहिले ट्रम्प प्रशासनको सरकारी खर्च घटाउने र कर्मचारी संख्या कम गर्ने ‘डिपार्टमेन्ट अफ गभर्मेन्ट इफिसियन्सी’ (डोज) को नेतृत्वमा छन्।
उनले मे महिनाबाट डोजलाई हप्तामा एकदेखि दुई दिन मात्र समय दिने बताएका छन्।
ट्रम्पले चीनमाथि लगाएको भन्सारले पनि टेस्लामाथि नकारात्मक असर पारेको छ, जसले कम्पनीको आपूर्ति श्रृंखलामा असर पुर्याउँदै लागत बढाउने खतरा बढाएको छ।
मस्कले टेस्लाको भविष्यमा एआईले योगदान पुर्याउने विश्वास व्यक्त गरेका छन्, तर विगतमा लगानीकर्ताहरू यसप्रति खासै विश्वस्त देखिएका थिएनन्।यो वर्षमात्र टेस्लाको सेयर मूल्य ३७ प्रतिशतले घटेको छ।
