आर्थिक गतिविधि बढाउन ‘अटो शो’को योगदान रहन्छः संयोजक केसी

पोखरामा पहिलो पटक आयोजना हुन लागेको ‘वाडा अटो शो २०२५’ ले स्थानीय अर्थतन्त्रमा सकारात्मक प्रभाव पार्ने आयोजकले बताएका छन्।

नाडा अटोमोबाइल्स एसोसिएसन अफ नेपाल र पश्चिमाञ्चल अटोमोबाइल डिलर्स एसोसिएसन (वाडा) को संयुक्त आयोजनामा चैत १४ देखि १७ सम्म अमरसिंहचौरमा अटो शो आयोजना हुन लागेको हो।

वाडाका उपाध्यक्ष एवं अटो शो संयोजक निरन केसीका अनुसार यो कार्यक्रमले नेपालको अटोमोबाइल बजारलाई प्रवर्द्धन गर्नेछ।

“अटो शोले गाडी खरिदबिक्रीसँगै पर्यटन, होटल व्यवसाय, वित्तीय क्षेत्र, इन्स्योरेन्सलगायतका क्षेत्रमा आर्थिक चहलपहल बढाउनेछ,” केसीले भने।

अटो शोमा विद्युतीय तथा पेट्रोल/डिजेल गाडीका प्रतिष्ठित ब्रान्डहरूले भाग लिनेछन्।

बिवाइडी, हुन्डाई, टाटा, एमजी, किया, टिभिएस, बजाज, रोयल इनफिल्डलगायतका ब्रान्डका सवारीसाधन प्रदर्शन गरिनेछ।

विद्युतीय सवारीको प्राथमिकता
नेपालमा विद्युतीय गाडीहरूको बढ्दो लोकप्रियतासँगै अटो शोमा इभी गाडीहरूको बाहुल्यता रहनेछ।

“नेपालको बजारमा इभीको आकर्षण बढ्दै गएको छ, अटो शोले यसलाई अझ प्रवर्द्धन गर्नेछ,” केसीले बताए।

कार्यक्रममा गाडी खरिद गर्न चाहने ग्राहकका लागि स्पट एक्सचेन्ज तथा फाइनान्सिङको सुविधा उपलब्ध गराइनेछ।

साथै, इन्स्योरेन्स, अटो कम्पोनेन्ट्स, ग्यारेज उपकरणलगायतका स्टलहरू पनि रहनेछन्।

संयोजक केसीका अनुसार अटो शो पोखराको अटोमोबाइल उद्योगको विकासमा महत्वपूर्ण भूमिका खेल्नेछ।

“यसले पोखरामा अटोमोबाइल बजारको सम्भावनालाई उजागर गर्नेछ र आगामी वर्षहरूमा अझ ठूलो सहभागिताका लागि मार्ग खोल्नेछ,” उनले थपे।