यामाहाद्वारा काठमाडौँमा माइलेज च्यालेन्ज र र्यालीको आयोजना

काठमाडौंका लागि यामाहाको स्कुटर तथा मोटरसाइकलको आधिकारिक बिक्रेता ब्लू स्क्वाएर, नक्सालले यामाहा रेजेडआर हाइब्रिड १२५ सी.सी. सेग्मेन्टको स्कुटरको माइलेज च्यालेन्ज र र्‍याली सफलतापूर्वक सम्पन्न गरेको छ।

यामाहा रेजेडआर हाइब्रिड १२५ सी.सी.लाई नेपालको स्कुटर सेग्मेन्टमा सबैभन्दा उच्च माइलेज दिने स्कुटरका रूपमा गरिँदै आएको दाबीलाई सत्य साबित गर्न यस कार्यक्रमको आयोजना गरिएको हो।

यामाहा रेजेडआर हाइब्रिड १२५ सी.सी. जस्तोसुकै भू-भागमा पनि सजिलै चलाउन सकिने र अरू कम्पनीका स्कुटरको तुलनामा उच्च माइलेज दिने कुरा प्रमाणित गर्न डिलरले काठमाडौंका आफ्ना २५ जना रेजेडआर हाइब्रिड १२५ सी.सी. का ग्राहकहरूलाई माइलेज च्यालेन्जमा सहभागी गराएको थियो।

कार्यक्रम यामाहा शोरुम ब्लू स्क्वाएर, नक्सालबाट सुरु भई दक्षिणकाली भिलेज रिसोर्टमा पुगेर सम्पन्न भएको थियो।

स्कुटरले समतल बाटोमा मात्र नभई उकालो, ओरालो र खाल्डा-खुल्डीमा समेत कस्तो प्रदर्शन गर्छ र कति माइलेज प्रदान गर्छ भन्ने हेतुले उक्त स्थान रोजिएको हो।

माइलेज च्यालेन्जमा सहभागी ग्राहकहरूलाई विभिन्न मनोरञ्जनात्मक खेलहरू खेलाउँदै रेजेडआर हाइब्रिड १२५ सी.सी. का बारेमा जानकारी समेत गराइएको थियो।

स्कुटरका बारेमा जानकारी गराउने क्रममा यामाहा नेपालका कार्यकारी निर्देशक तथा प्रमुख कार्यकारी अधिकृत दीपक कुमार अग्रवालले भने, “रेजेडआर १२५ हाइब्रिड विभिन्न आवश्यकता र सवारहरूको प्राथमिकता पूरा गर्न स्ट्यान्डर्ड, डिलक्स, प्रिमियम र प्रिमियम प्लस गरी चार भेरियन्टमा उपलब्ध छ।

१४५ एमएम को ग्राउन्ड क्लियरेन्सको साथ मात्र ९९ किलोग्राम तौलको यस हल्का स्कुटरमा युनिफाइड ब्रेकिङ सिस्टम (यूबीएस), साइड स्ट्यान्ड इन्जिन कट-अफ फङ्सन र २१ लिटर अन्डर-सीट भण्डारण जस्ता सुविधाहरू छन्।

स्टप एण्ड स्टार्ट प्रणालीले छोटो बिसौनीमा इन्जिनलाई स्वतः स्विच अफ गरी मूल्यवान ऊर्जा बचत गरेर इन्धन दक्षता अझ बढाउँछ।”

र्‍यालीको समापनमा माइलेज च्यालेन्जका विजेताहरूको नाम घोषणा गरिएको थियो, जसमा:
– ७३.३३ कि.मि. प्रतिलिटर माइलेजका साथ अनिशा श्रेष्ठ प्रथम
– ६४.७२ कि.मि. प्रतिलिटर माइलेजका साथ काजल शाही द्वितीय
– ५९.७५ कि.मि. प्रतिलिटर माइलेजका साथ शमशेर आलम तृतीय बने।

यामाहाको यस उत्साहजनक पहललाई साथ दिने सहभागीहरूलाई धन्यवाद तथा विजेताहरूलाई बधाई ज्ञापन गर्दै कार्यकारी निर्देशक तथा प्रमुख कार्यकारी अधिकृत अग्रवालले सेवाग्राहीप्रति आफ्नो उत्पादनको विश्वास बढाउन र सेवाग्राहीका अपेक्षाबारे जानकारी लिन यस किसिमका कार्यक्रमहरू आगामी दिनमा देशभरि आयोजना गर्ने प्रतिबद्धता दोहोर्याए।