विराटनगर : मोरङको रतुवामाई नगरपालिका–७ मा बिहीबार बिहान मोटरसाइकल दुर्घटना हुँदा चालकको मृत्यु भएको छ ।
सिजुवा–कादुपाडा भित्री सडकखण्डमा कादुपाडाबाट सिजुवातर्फ जाँदै गरेको प्रदेश १–०१–५० प ८५२२ नम्बरको मोटरसाइकल आफैं अनियन्त्रित भएर बिहान ५:४० बजेतिर दुर्घटनामा परेको प्रहरीले जनाएको छ ।
मोरङ ट्राफिक प्रमुख प्रहरी निरीक्षक सुमन न्यौपानेका अनुसार दुर्घटनामा मोटरसाइकल चालक रतुवामाई–७ का अन्दाजी २८ वर्षीय कनैया साहको मृत्यु भएको छ ।
मोटरसाइकल नालीमा पल्टिएर गम्भीर घाइते भएका साहलाई घटनास्थलबाट उद्धार गरेर उपचारका लागि उर्लाबारीको मदन भण्डारी अस्पताल एवं ट्रमा सेन्टर लगिएको थियो ।
उपचारकै क्रममा बिहान ६:५५ बजेतिर उनको मृत्यु भएको प्रनि न्यौपानेले बताए ।
मोटरसाइकलको तीव्र गतिका कारण दुर्घटना भएको हुनसक्ने प्रहरीको प्रारम्भिक अनुमान छ ।
मोटरसाइकललाई इलाका प्रहरी कार्यालय सिजुवामा राखेर घटनाको अनुसन्धान सुरु गरिएको प्रहरीले जनाएको छ ।