पेट्रोलियम सवारीसाधनको तुलनामा विद्युतीय सवारीसाधनको खरिद मूल्य बढी छ । तर, सञ्चालन खर्च भने निकै सस्तो हुने विभिन्न अध्ययनले देखाएको छ । पछिल्लो मूल्यअनुसार गाडी, माइक्रो बसलगायतका सवारीसाधन एक किलोमिटर गुड्दा झन्डै २० रुपैयाँको इन्धन (तेल) खर्च हुन्छ । तर, विद्युतीय सवारीसाधन एक किलोमिटर गुड्दा बढीमा एक रुपैयाँ २० पैसाको विद्युत् प्रयोग हुने नेपाल विद्युत् प्राधिकरणको एक अध्ययनले देखाएको छ । यसैगरी, सामान्यतया बाइक एक किलोमिटर गुड्दा पाँच रुपैयाँको पेट्रोल खर्च हुन्छ । तर, विद्युतीय बाइक एक किलोमिटर गुड्दा ५० पैसाको विद्युत् प्रयोग हुने व्यवसायीहरू बताउँछन् ।