ए एन्ड एस इभेन्ट्स बाई जेनेसिसले पहिलो पटक काठमाडौंमा राइड विथ भ्लगर्स कार्यक्रम संचालन गर्ने भएको छ । आगामी असोज ३ गते संचालन हुने सो कार्यक्रममा एक दर्जन भ्लगर्स र टु ह्विल टुरिङका एक्सपर्टहरु सहभागी हुनेछन् ।
विश्वकै अग्रगामी मोटरसाइक्लिङ महासंघ एफआईएम तथा नेपालको मोटरसाइकल/मोटर स्पोर्ट्स, अटोमोबाइल्स मोबिलिटी तथा ड्राइभ र टु ह्विल टुरिङ तथा रोड सेफ्टीको लागि राष्ट्रिय संघ नेपाल अटोमोबाइल्स एसोसिएसन (नासा नेपाल) सँगको सहकार्यमा सो कार्यक्रम हुने ए एन्ड एस इभेन्ट्सले जनाएको छ ।
नेपालमा सोसियल मिडियाको लोकप्रियता र प्रभावकारिता बढिरहेको अवस्थामा यस प्रकारको राइडले टु ह्विल टुरिङ र मोटरसाइक्लिङ तथा मोटर स्पोर्ट्सलाई समेत अझ सुरक्षित, व्यवस्थित तथा थप लोकप्रिय बनाउन मदत पुग्ने बताइएको छ ।
असोज ३ गते भ्लगरहरुसँग अन्तरक्रिया, दिउसो काठमाडौँ देखि मार्खु राइड तथा फोटोग्राफी र भिडियोग्राफी तथा साँझमा भ्लगर्स मिट एन्ड ग्रिट गरिनेछ ।
हालसालै नासा नेपालद्वारा पर्यटन बोर्डको सहयोगमा प्रकाशित Two wheel Touring In Nepal Manual book समेत सो अवसरमा सार्वजनिक गरिने छ ।
नासा नेपालको एसोसिएट सदस्य ए एन्ड एस इभेन्ट्स बाई जेनेसिस विगत १० वर्ष देखि एड्भेन्चर टुरिजम, टुरिजम स्पोर्ट्स, अफरोड राइड तथा रिक्रिएसनको क्षेत्रमा क्रियाशील अग्रणी कम्पनी हो ।