चीनको केरुङ नाकाको मुख्य विपद् प्रभावित क्षेत्रमा ठूला उद्धार तथा खोजी उपकरण पुगेका छन्। राष्ट्रिय राजमार्ग जी२१६ को बाढीले बगाएको अन्तिम सडकखण्डमा अस्थायी सडक निर्माण सम्पन्न भएपछि ठूला मेसिनलाई प्रभावित क्षेत्रमा पुर्याउन सम्भव भएको हो।
नेपाल–चीन सीमाको नेपालतर्फबाट आएको ठूलो पहिरोसहितको बाढीले अगस्ट २६ मा केरुङ नाका आसपासको क्षेत्रमा ठूलो क्षति पुर्याएको थियो। घटनापछि केरुङ नाकातर्फ जाने मुख्य मार्ग जी२१६ समेत विभिन्न स्थानमा क्षतिग्रस्त भएर आवागमन अवरुद्ध भएको थियो।
सडक पुनः सञ्चालन, खोज तथा उद्धार र राहतका कामलाई एकसाथ अघि बढाइएको छ। रातभर गरिएको मर्मतपछि जी२१६ को बाढीले बगाएको अन्तिम सडकखण्डमा अस्थायी सडक बनाइएको हो। यससँगै एक्स्काभेटरलगायत ठूला उद्धार मेसिनलाई विपद्को मुख्य प्रभावित क्षेत्रमा पुर्याइएको छ।
उद्धार टोलीले उक्त सडकखण्डलाई थप मजबुत बनाउने कामसमेत गरिरहेको छ। सडक बलियो भएपछि साना सवारीसाधनसमेत सञ्चालन गर्न सकिने र यसबाट उद्धारकर्मी, राहत सामग्री तथा आवश्यक उपकरण प्रभावित क्षेत्रमा पुर्याउन थप सहज हुने अपेक्षा गरिएको छ।
उद्धारकर्मी मंगलबार राति पैदलै विपद्को मुख्य क्षेत्रमा पुगेका थिए। बुधबार बिहानसम्म उक्त क्षेत्रमा एक्स्काभेटरलगायत ठूलो संख्यामा भारी उपकरण पुर्याइएको जनाइएको छ।
हाल केरुङ नाका आसपासका प्रभावित क्षेत्रमा विभिन्न प्रकारका भारी उपकरण परिचालन गरी बेपत्ता व्यक्तिको खोजी गर्नुका साथै क्षतिग्रस्त सडक तथा आसपासको क्षेत्र सफा गर्ने र सम्याउने काम भइरहेको छ।
