लामो पर्खाइपछि प्रख्यात मोटरसाइकल निर्माता रोयल इन्फिल्ड (Royal Enfield) ले आफ्नो बहुप्रतीक्षित ‘बुलेट ६५०’ (Bullet 650) भारतमा आधिकारिक रूपमा सार्वजनिक गरेको छ।
भारतीय बजारमा यसको सुरुवाती एक्स-शोरूम मूल्य ३,६४,८६५ भारतीय रुपैयाँ तोकिएको छ, जुन कम्पनीकै क्लासिक ६५० (Classic 650) को बेस भेरियन्ट बराबर हो।
क्लासिक र ऐतिहासिक लुक्स: यस नयाँ बाइकमा साविकको बुलेट ३५० को चर्चित डिजाइनलाई निरन्तरता दिइएको छ। जसमा रोयल इन्फिल्डको ट्रेडमार्क गोल हेडलाइट, ‘टाइगर आई’ लाइट, टियर-ड्रप आकारको इन्धन ट्याङ्की र फराकिलो पछाडिको ह्विल फेंडर (Fender) सामेल छन्। क्लासिक ६५० को तुलनामा यसमा सिंगल-पिस (एउटै जोडिएको) कम्फर्ट सिट दिइएको छ। यो बाइक ब्याटलसिप ब्लु र क्यानन ब्याल्क गरी दुई रङमा उपलब्ध छ।
शक्तिशाली ट्विन इन्जिन: यसमा ६४७.९५ सीसी (cc) को एयर र आयल-कुल्ड, प्यारालल-ट्विन इन्जिन जडान गरिएको छ। यो शक्तिशाली इन्जिनले ४६.४ बीएचपी पावर र ५२.३ एनएम टर्क पैदा गर्छ। यसमा स्लिप-एन्ड-असिस्ट क्लचसहितको ६-स्पीड गियरबक्स उपलब्ध छ।
मजबुत चेसिस र टायर: बाइकलाई ‘ड्यूल-क्रेडल’ फ्रेममा तयार पारिएको छ। यसको अगाडि १९-इन्च र पछाडि १८-इन्चको स्पोक-ह्विल (Spoke Wheel) सेटअप छ, जसले यसलाई क्लासिक विन्टेज लुक्स दिन्छ।
सुरक्षा र ब्रेकिङ: सुरक्षाका लागि अगाडि ३२० एमएम र पछाडि ३०० एमएमको डिस्क ब्रेकका साथै ड्यूल-च्यानल एबीएस (ABS) प्रविधि राखिएको छ।
६५० सीसी प्लेटफर्मको अन्तिम बाइक: यो ६५० सीसी सेगमेन्टमा रोयल इन्फिल्डको सम्भवतः अन्तिम बाइक हुनेछ। यसपछि कम्पनीले आफ्नो नयाँ ७५० सीसी (cc) प्लेटफर्ममा ध्यान केन्द्रित गर्नेछ, जसको पहिलो प्रोटोटाइप ‘जीटी कप २०२६’ (GT Cup 2026) रेसमा ‘कन्टिनेन्टल जीटी-आर ७५०’ का रूपमा देखिनेछ।
नेपाल र भारतमा ‘बुलेट’ को छुट्टै विरासत रहेकाले यो शक्तिशाली ६५० सीसी संस्करण क्लासिक र बलियो बाइक खोज्ने राइडरहरूका लागि निकै आकर्षक विकल्प बन्ने निश्चित छ।
