आम नागरिक ठगीमा पर्दा उजुरी गर्न जाने निकाय हो प्रहरी संगठन तर, प्रहरी कर्मचारीलाई नै कसैले ठगी गर्न सक्छ भने सर्वसाधारणको अवस्था के होला भन्ने सहजै अनुमान गर्न सकिन्छ ।
भारतको उत्तर प्रदेश राज्यको बान्दामा ठगहरुको एउटा गिरोहले पुलिसलाई नै ठगी गरेको छ ।
सो क्षेत्रका एसपी अंकुर अग्रवालका अनुसार ठगीमा संलग्न एक सदस्यले एक जना प्रहरीलाई फोन गरेर ‘तपाईंको छोराले एउटा प्रतियोगितामा सफारी गाडी जितेको छ’ भन्दै फोन गरेका थिए ।
ठगीमा संलग्न गिरोहका तर्फबाट ती प्रहरीलाई आधार कार्ड, बैंक खाता र केही अन्य डिटेल मागिएको थियो ।
प्रतियोगितामा जितेको गाडी पठाउन आवश्यक प्रक्रिया पूरा गर्नका लागि भन्दै विभिन्न डकुमेन्ट र आवश्यक जानकारी चाहिएको भनेर उनीहरुले ती पुलिसलाई विश्वासमा पारेका थिए ।
तर केही समयपछि ती प्रहरीको बैंक खाताबाट ८२ हजार रुपैयाँ निकालिएको म्यासेज मोबाइल फोनमा आयो ।
त्यसपछि ती प्रहरीले आफ्नो बैंक खाता बन्द गरेर एसपी अंकुर अग्रवाललाई घटनाबारे जानकारी गराएको बताइएको छ ।
एसपी अग्रवालले तत्कालै कारबाही प्रारम्भ गर्दै झारखण्डमा बस्दै आएका ४ जनाविरुद्ध मुद्दा दर्ता गर्न आदेश दिएका छन् । ठगीमा संलग्न ती चार जना झारखण्ड निवासी रहेको बताइएको छ ।