३ महिनापछि बन्यो लिपिङ बेलिब्रिज

गत असोजमा बाढीले बगाएको तातोपानी नाकाको लिपिङ बजार जोड्ने बेलिब्रिज सोमबारबाट सञ्चालनमा ल्याइएको छ ।

नेपाली सेनाको प्राविधिक सहयोगमा ६ दिन–रात गरेर ४५ दशमलव ७२ मिटर लामो लिपिङखोला बेलिब्रिज आइतबार साँझ तयार गरिएको हो ।

सेनाका नम्बर २६ बाहिनीपति सहायक रथी अशोक गुरुङले सोमबार २८ टन भारवहन क्षमताको बेलिब्रिजको उद्घाटन गरे ।

सेनाले सडक डिभिजन कार्यालयलाई बेलिब्रिज हस्तान्तरण गरेसँगै सीमाक्षेत्रको बजारबाट यातायात सञ्चालन भएको छ ।

गत असोजमा लिपिङखोला र भोटेकोशीमा आएको बाढीले यहाँ पुल बगाएको थियो । बाढीको केही समयमै लार्चार्मा ह्युमपाइप राखेर यातायात सञ्चालनमा ल्याइएको थियो ।

लिपिङमा बेलिब्रिज जोडिएपछि सीमावासी र व्यवसायी उत्साहित भएका छन् ।

‘यसअघि लिपिङ पुलको कुनाबाट कच्ची सडक जोडेर चलाइए पनि जोखिमपूर्ण यात्रा गर्नुपरेको थियो, बेलिब्रिज जोडिएसँगै नाका पनि सञ्चालनमा आएको छ,’ भोटेकोशी–२ का वडाध्यक्ष कुमार श्रेष्ठले भने ।

यसअघि नेपाल–चीनका अधिकारीबीच भएको अनौपचारिक छलफलअनुरूप माघ ६ देखि आइतबारसम्म नाका बन्द रहेको प्रमुख जिल्ला अधिकारी किरण थापाले जनाए ।

बेलिब्रिज निर्माण पूरा भएपछि नाका पहिलेझैं सञ्चालनमा आएको छ ।

सीमाक्षेत्र तातोपानीमा बेलिब्रिज, ह्युमपाइपबाहेक तातोपानी क्षेत्रमा बनाएको मितेरी पुलछेउको छोटी भन्सार कार्यालयको सानो भवन मात्रै छ ।

यसबाहेक सरकार र अन्य पक्षबाट सीमाक्षेत्रको भौतिक पूर्वाधारका लागि केही काम नभएको गुनासो छ ।

तातोपानी नाका जोड्ने सडक कोदारी राजमार्ग (२६ किलोमिटर) दर्जनौं स्थानमा बाढीपहिरो, खाल्डाखुल्डीले जोखिमपूर्ण बनेको छ ।

‘तातोपानी नाकामा सरकारले केही गरेको देखिँदैन, यहाँको बजार खण्डहर छ, अन्तर्राष्ट्रिय नाका जोड्ने कोदारी राजमार्गको बेहाल छ,’ भोटेकोशी–२ का स्थानीय साङ्बो शेर्पाले गुनासो गरे ।