याडियाको उत्कृष्ट मार्केटिङ अवार्ड कुजु नेपाललाई
Auto Nepal - Nepal's No. 1 Auto Magazine, Since - 2005
January 7, 2022

याडिया ब्रान्डको इलेक्ट्रिक स्कुटरको नेपालका लागि आधिकारिक वितरक कुजु नेपाल प्रालिले २०२१ को उत्कृष्ट मार्केटिङ अवार्ड पाएको छ ।चिनियाँ ब्रान्ड याडियाले प्रत्येक वर्ष विभिन्न विधामा अवार्ड वितरण गर्दै आएको छ । ती अवार्ड मध्ये यो वर्षको उत्कृष्ट मार्केटिङ अवार्ड कुजु नेपालले पाएको हो ।

कुजु नेपाल प्रालिका निर्देशक उमिद श्रेष्ठका अनुसार हाल कोरोनाका कारण चीनमा कार्यक्रम गर्ने वातावरण नभएकाले कम्पनीले सो पुरस्कारको घोषणा मात्र गरेको छ । याडिया ब्रान्डका तीन मोडल एस–लाइक, जी५ र सी१एस गत असार महिनामा नेपाली बजारमा भित्रिएका थिए । निर्देशक श्रेष्ठका अनुसार डेढ महिनाकै अवधिमा नेपाली बजारमा याडियाका ५० युनिट इलेक्ट्रिक स्कुटर बिक्री भएका थिए ।

हाल याडियाका सबै स्कुटर सोल्ड आउट भइसकेका छन् । आगामी फेब्रुअरी महिना अन्त्य सम्ममा नयाँ लट नेपाली बजारमा भित्र्याउने तयारी भइरहेको श्रेष्ठले बताए । चिनियाँ ब्रान्ड याडियाका स्कुटर ८० भन्दा धेरै देशमा विक्री हुँदै आएको छ भने सन् २०२० मा सार्वाधिक धेरै इलेक्ट्रिक स्कुटर विक्री गर्ने कम्पनी पनि बन्न सफल भएको थियो । कुजु नेपाल प्रालिले युरोपियन स्ट्यान्डर्डका नेपाली बजार सुहाउँदो उत्कृष्ट स्कुटर नेपाली बजारमा ल्याएको छ ।